अंधेरी पूर्व विधानसभा पोटनिवडणुकीतून भाजपच्या उमेदवारांनी माघार घेतल्यामुळे निवडणुकीचा उत्साह ओसरला आहे, मात्र शिवसेनेच्या (उद्धव बाळासाहेब ठाकरे) उमेदवाराच्या विरोधात अपक्ष उमेदवार असल्यामुळे निवडणूक होणार आहे. या निवडणुकीसाठी २५६ मतदान केंद्रे असणार आहेत.
या मतदान केंद्रांवर ३३३ बॅलेट युनिट, ३३३ कंट्रोल युनिट आणि ३५९ व्हीव्हीपॅट वापरण्यात येतील. प्रत्येक विधानसभा मतदारसंघात जेवढ्या यंत्रांची आवश्यकता आहे, त्यापेक्षा सुमारे २० टक्के अतिरिक्त बॅलेट युनिट व कंट्रोल युनिट आहेत. सुमारे ३० टक्के अतिरिक्त व्हीव्हीपॅट यंत्रांची तजवीज करण्यात आली आहे.
मुंबई उपनगर जिल्ह्यातील ‘१६६ अंधेरी पूर्व’ या मतदारसंघाची पोटनिवडणूक येत्या ३ नोव्हेंबर रोजी होणार आहे. या पोटनिवडणुकीदरम्यान कोणत्याही यंत्रामध्ये काही तांत्रिक समस्या उद्भवल्यास पर्यायी यंत्रांची व्यवस्था सहजपणे करण्यासाठी सुमारे २० टक्के अतिरिक्त बॅलेट युनिट व कंट्रोल युनिट आहेत. सुमारे ३० टक्के अतिरिक्त व्हीव्हीपॅट यंत्रांची तजवीज करण्यात आली आहे. मतदान प्रक्रियेदरम्यान उपयोगात येणारी यंत्रे ही सशस्त्र सुरक्षा दलाच्या व कडेकोट बंदोबस्तात आणि सीसीटीव्ही कॅमेऱ्यांच्या देखरेखीत ठेवण्यात आली आहेत. ३ नोव्हेंबर रोजी मतदारांनी आपला मतदानाचा हक्क जरूर बजावावा, असे आवाहन करण्यात आले आहे.