मुंबई : मुंबईत गणेशोत्सवाच्या काळात भाविक तसेच पर्यटकांना वेगवेगळ्या ठिकाणी गणपती मंडळांना भेट देता यावी, या उद्देशाने बेस्टतर्फे रात्री साडेदहा ते सकाळी ६ या वेळेत २४ विशेष बसगाड्या चालविल्या जाणार आहेत.
७ सप्टेंबर ते १६ सप्टेंबर या कालावधीत या विशेष बसगाड्या चालविल्या जातील. दक्षिण मुंबईतून उत्तर-पश्चिम मुंबई परिसराकडे गिरगाव, लालबाग, परळ, चेंबूर आदी मार्गे या बस चालविल्या जातील. यात मार्ग क्रमांक ४ मर्यादित, ७ मर्यादित, ८ मर्यादित, ए-२१, ए-२५, ए-४२, ४४, ६६, ६९ आणि सी- ५१ यांचा समावेश आहे. प्रवाशांनी मागणी केल्यास आणखी काही मार्गांवर अशी सेवा दिली जाईल, असे बेस्ट प्रशासनाने म्हटले आहे.