मुंबई : व्यवसायाने निर्माता असलेल्या वयोवृद्ध पतीच्या आजारपणाचा गैरफायदा घेऊन त्याची प्रॉपटी हडपण्याचा प्रयत्न केल्याप्रकरणी गेल्या अडीच वर्षांपासून फरार असलेल्या आरोपी पत्नीला अखेर ओशिवरा पोलिसांनी अटक केली. रेणू बिजेंद्रपाल सिंग असे या ५६ वर्षीय आरोपी पत्नीचे नाव असून तिने निर्मात्या पतीची विविध दस्तावेजावर स्वाक्षरी घेऊन स्वत:च्या नावावर पॉवर ऑफ ॲॅटनी करीन पतीनेच तिला गिफ्ट डिड केल्याचे चित्र निर्माण करण्यात आले. अशाप्रकारे तिने ३ कोटी ६१ लाखांची प्रॉपटी स्वत:च्या नावावर केल्याचे तपासात उघडकीस आले आहे. अटकेनंतर तिला अंधेरीतील न्यायालयात हजर करण्यात आले होते. यावेळी न्यायालयाने पोलीस कोठडी सुनावली होती. तिच्याकडून फसवणूक करून प्राप्त केलेल्या प्रॉपटीची कागदपत्रे पोलिसांनी ताब्यात घेतली आहेत.