मुंबई : गेल्या काही दिवसांत ‘बेस्ट’ बसच्या अपघातांचे सत्र थांबण्याचे चिन्ह दिसत नाही. शुक्रवारी दुपारी अंधेरी परिसरात ‘बेस्ट’च्या भाडेतत्त्वावरील बसच्या चालकाचे वाहनावरील नियंत्रण सुटल्याने बसने तब्बल १४ वाहनांना धडक दिली. या अपघातात दोन जण जखमी झाले आहेत. गेल्या दोन दिवसांतील ‘बेस्ट’ बसची ही दुसरी मोठी दुर्घटना आहे.
बेस्ट उपक्रमाच्या ताफ्यात भाडेतत्त्वावरील बसेसचे अपघात होण्याचे प्रमाण वाढले आहे. दोन दिवसांपूर्वी भांडुप येथे भाडेतत्त्वावरील बसचा अपघात झाला. या अपघातात एक जण जखमी झाल्याची घटना ताजी असतानाच शुक्रवारी अंधेरी सबवेजवळील एस. व्ही. रोडच्या दक्षिण वाहिनी मार्गावर पुन्हा बेस्ट बसचा अपघात झाला. मिल्लत नगर ते अंधेरी (पश्चिम) बसस्थानक या मार्गावरील क्रमांक २४२ ची बस सीझर रोडवरून उजवीकडे वळत असताना चालकाचे वाहनावरील नियंत्रण सुटल्याने हा भीषण अपघात झाला.
या अपघातात शांतालाल यादव (३३) व साक्षी (३३) हे दोघे जखमी झाले, तर नऊ रिक्षा, चार खासगी कार आणि एका तीनचाकी टेम्पोला बसने धडक दिली. या अपघातानंतर परिसरात काही काळ वाहतूक विस्कळीत झाली. दरम्यान, दुर्घटनाग्रस्त बस नंतर टोईंगद्वारे अंधेरी पश्चिम बस डेपोत हलविण्यात आली.
दुसरी मोठी दुर्घटना
गेल्या बुधवारी भांडुप येथे भाडेतत्त्वावरील इलेक्ट्रिक बस रिव्हर्स घेताना काही वाहनांना धडकली होती. त्या अपघातात एका ४३ वर्षीय व्यक्तीला दुखापत झाली होती. त्यानंतर आता दोन दिवसांच्या अंतराने दुसरा मोठा अपघात घडल्याने ‘बेस्ट’च्या भाडेतत्त्वावरील बसेस कितपत सुरक्षित आहेत, याबाबत प्रश्नचिन्ह उपस्थित झाले आहे.