वांद्रे-कुर्ला संकुल (BKC) परिसरात सार्वजनिक वाहतुकीचा वापर वाढवण्यासाठी 'साप्ताहिक सार्वजनिक वाहतूक दिन' उपक्रमाला सुरुवात झाली असतानाच रिक्षाचालकांच्या मनमानी कारभाराविरोधात प्रवाशांकडून तक्रारी समोर येऊ लागल्या आहेत. टिळक नगर, कुर्ला आणि लोकमान्य टिळक टर्मिनस (LTT) परिसरात काही रिक्षाचालक मीटरने प्रवास करण्यास नकार देत अवाजवी भाड्याची मागणी करत असल्याचा आरोप करण्यात आला आहे.
टिळक नगर ते BKC साठी ३०० रुपयांची मागणी
उपक्रमाच्या पहिल्याच दिवशी एका प्रवाशाने सोशल मीडियावर आपला अनुभव शेअर केला. त्यानुसार, टिळक नगर रेल्वे स्थानकाबाहेर एका रिक्षाचालकाला BKC ला जाण्यास सांगितले असता त्याने मीटरने येण्यास नकार दिला आणि थेट ३०० रुपये भाड्याची मागणी केली.
इतकेच नव्हे तर, त्यानंतर संबंधित रिक्षाचालकाने शेअर रिक्षाचा पर्याय देत प्रत्येक प्रवाशाकडून २०० रुपये आकारण्याचा प्रस्ताव दिल्याचाही दावा करण्यात आला आहे.
LTT आणि कुर्ला परिसरातही तीच समस्या
दुसऱ्या एका प्रवाशानेही अशाच प्रकारच्या तक्रारी केल्या आहेत. लोकमान्य टिळक टर्मिनस आणि कुर्ला स्थानक परिसरात रिक्षाचालकांकडून मीटरऐवजी ठराविक रक्कम मागितली जात असल्याचा आरोप करण्यात आला आहे.
तक्रारीनुसार, LTT ते कुर्ला पूर्व या छोट्या अंतरासाठी मीटरनुसार साधारण ४५ ते ५० रुपये भाडे येते. मात्र काही रिक्षाचालकांकडून यासाठी तब्बल १०० रुपये आकारले जात असल्याचे प्रवाशांचे म्हणणे आहे.
मुंबई पोलिसांची दखल
ही बाब सोशल मीडियावर समोर आल्यानंतर मुंबई पोलिसांनीही त्याची दखल घेतली आहे. पोलिसांनी संबंधित तक्रार BKC वाहतूक विभागाकडे पाठवण्यात आल्याचे सांगितले. "ही बाब आमच्या निदर्शनास आणून दिल्याबद्दल धन्यवाद. आवश्यक कारवाईसाठी BKC ट्रॅफिक विभागाला माहिती देण्यात आली आहे," असे मुंबई पोलिसांनी आपल्या प्रतिसादात म्हटले आहे.
BKC मधील वाहतूक कोंडी कमी करण्याचा प्रयत्न
दरम्यान, मुंबई महानगर प्रदेश विकास प्राधिकरण (MMRDA) आणि वर्ल्ड रिसोर्सेस इन्स्टिट्यूट (WRI) इंडिया यांच्या संयुक्त विद्यमाने BKC साप्ताहिक सार्वजनिक वाहतूक दिन उपक्रम सुरू करण्यात आला आहे.
या उपक्रमाअंतर्गत प्रत्येक शुक्रवारी BKC मध्ये काम करणाऱ्या कर्मचाऱ्यांना खासगी वाहनांऐवजी लोकल रेल्वे, मेट्रो, बस आणि शेअर्ड मोबिलिटी सेवांचा वापर करण्याचे आवाहन करण्यात आले आहे. वाहतूक कोंडी कमी करणे, प्रदूषणावर नियंत्रण ठेवणे आणि शाश्वत प्रवासाला प्रोत्साहन देणे हा या मोहिमेचा उद्देश आहे. मात्र, उपक्रमाच्या पहिल्याच दिवशी रिक्षाचालकांकडून मीटरनुसार प्रवासास नकार देणे आणि अवाजवी भाड्याची मागणी केल्याच्या तक्रारी समोर आल्याने या मोहिमेच्या प्रभावी अंमलबजावणीबाबत प्रश्नचिन्ह उपस्थित होत आहे.