मुंबई शहर स्वच्छ ठेवण्यासाठी नागरिकांचा सहभाग वाढवण्याच्या उद्देशाने बृहन्मुंबई महानगरपालिकेने नवा उपक्रम सुरू केला आहे. या उपक्रमांतर्गत नागरिकांना त्यांच्या परिसरातील कचरा साचणारी ठिकाणे आणि असुरक्षित कचरा टाकण्याच्या जागांची माहिती थेट बीएमसीला देता येणार आहे.
महापालिकेने सोशल मीडियावर शेअर केलेल्या माहितीनुसार, नागरिक आता 'मुंबई क्लीन लीग' प्लॅटफॉर्मद्वारे कचरा साचणाऱ्या ठिकाणांची तक्रार करू शकतात. तक्रार केल्यानंतर बीएमसीकडून संबंधित ठिकाणी स्वच्छता मोहीम राबवली जाणार आहे.
'मुंबई क्लीन लीग'वर रजिस्ट्रेशन कसे कराल?
या सुविधेचा वापर करण्यासाठी नागरिकांनी प्रथम 'मुंबई क्लीन लीग' संकेतस्थळावर मोबाईल क्रमांकाच्या मदतीने रजिस्ट्रेशन करणे आवश्यक आहे. यानंतर युजर्सना नाव, पत्ता, पिनकोड आणि प्रभाग क्रमांक याची माहिती भरावी लागेल. ही माहिती भरल्यानंतर नागरिक पोर्टलमध्ये लॉगिन करू शकतात.
कचरा साचणाऱ्या ठिकाणांची 'अशी' करा तक्रार
लॉगिन केल्यानंतर स्क्रीनच्या डाव्या बाजूला असलेल्या 'गार्बेज हॉटस्पॉट' पर्यायावर क्लिक करून 'रजिस्टर हॉटस्पॉट' निवडावे लागेल. त्यानंतर नागरिकांना परिसराचे नाव, प्रभाग, जवळील महत्त्वाची जागा याबाबतची माहिती द्यावी लागेल.
याशिवाय, संबंधित कचऱ्याच्या ठिकाणाचे फोटो अपलोड करण्याची आणि तक्रारीसंदर्भात अतिरिक्त माहिती लिहिण्याची सुविधाही या प्लॅटफॉर्मवर उपलब्ध आहे.
बीएमसीकडून तातडीने स्वच्छता मोहीम
हॉटस्पॉटची नोंद झाल्यानंतर संबंधित ठिकाणी बीएमसीकडून कचरा उचलून स्वच्छता मोहीम राबवली जाणार आहे. मुंबईतील स्वच्छता आणि स्वच्छताविषयक व्यवस्था सुधारण्याच्या उद्देशाने हा उपक्रम सुरू करण्यात आला आहे.
मुंबईत १६२ ठिकाणी वारंवार कचऱ्याची समस्या
दरम्यान, बृहन्मुंबई महानगरपालिकेने मुंबईत वारंवार कचरा साचणारी १६२ ठिकाणे ओळखली आहेत. वारंवार स्वच्छता मोहीम राबवूनही या ठिकाणी पुन्हा कचरा साचत असल्याचे निरीक्षण आणि नागरिकांच्या तक्रारींतून समोर आले आहे.
प्रभाग कार्यालयांना कडक सूचना
या ठिकाणांवरील कचरा तातडीने हटवून भविष्यात पुन्हा बेकायदा कचरा टाकला जाणार नाही यासाठी कडक उपाययोजना करण्याचे आदेश प्रभाग कार्यालयांना देण्यात आले आहेत.
अनेक भागांत मूलभूत सुविधा नाहीत
महापालिकेच्या निदर्शनास आले आहे की, कचरा हॉटस्पॉट परिसरांमध्ये सामुदायिक कचरापेट्यांसारख्या मूलभूत सुविधांचा अभाव आहे. त्यामुळे काही नागरिक अधिकृत संकलन केंद्रांचा वापर न करता उघड्यावर कचरा टाकत असल्याचेही समोर आले आहे.
आयुक्तांकडून थेट आढावा
महापालिका प्रशासनाने आता प्रत्येक प्रभागासाठी स्वतंत्र उद्दिष्टे निश्चित केली असून कामगिरीचा आढावा थेट महापालिका आयुक्तांकडून घेतला जाणार आहे.