भाईंदर पश्चिमेस एका बड्या बिल्डरच्या बांधकाम साईटवर ठेकेदारामार्फत मजुरी काम करणाऱ्या मजुराच्या झालेल्या मृत्यू प्रकरणी ७ महिन्यांनी भाईंदर पोलिसांनी ठेकेदाराला विरुद्ध मृत्यूस कारणीभूत ठरल्या प्रकरणी गुन्हा दाखल केला आहे.
पश्चिमेस अग्निशमन केंद्रा जवळ शहरातील बडे बांधकाम व्यावसायिक असलेले दिलीप पोरवाल यांच्या लीना व्हेंचर्सचे २० मजली इमारतीचे काम सुरु आहे. इमारत बांधण्याचे कंत्राट मिळालेल्या दिनेश संघानी यांनी सेंट्रिंगचे काम महतो एन्टरप्राईझसचे जयराम महतो या ठेकेदारास दिले होते. दुसऱ्या मजल्याच्या स्लॅबचे कॉलमचे सेंट्रिंगचे काम करत असताना काम करणारा मजूर पशुपती ठाकूर (३०) हा २१ ऑक्टॉबर २०२१ रोजी खाली पडून गंभीर जखमी झाला होता. उपचारादरम्यान २७ ऑक्टोबर रोजी त्याचा मृत्यू झाला. याप्रकरणी ३ जून रोजी मयत पशुपतीचा लहान भाऊ आकाश याने दिलेल्या फिर्यादी नंतर ठेकेदार महतो याच्यावर गुन्हा दाखल करण्यात आला आहे. या प्रकरणी भाईंदर पोलीस पुढील तपास करत असून गुन्हा दाखल करण्यास ७ महिने लागल्याने आश्चर्य व्यक्त होत आहे.