मुंबई : २०२३ मध्ये लांब पल्ल्याच्या गाडीत चार जणांच्या हत्येचा आरोप असलेल्या माजी आरपीएफ कॉन्स्टेबल चेतन सिंग चौधरी याला पुन्हा ठाणे मानसिक रुग्णालयात हलवण्याचे निर्देश मुंबईतील एका न्यायालयाने कारागृह प्रशासनाला दिले आहेत. त्याच्या मानसिक आरोग्याबाबतचा अहवाल सादर करताना ‘तो खटल्याला सामोरे जाण्यासाठी सक्षम आहे की नाही’ याबाबत स्पष्ट मत मांडण्यास सांगितले आहे.
चौधरी याला यापूर्वी २० फेब्रुवारी ते १२ जुलै २०२५ या कालावधीत प्रादेशिक मानसिक रुग्णालय, ठाणे येथे दाखल करण्यात आले होते. आरोपी सध्या ठाणे कारागृहात आहे
अतिरिक्त सत्र न्यायाधीश प्रवीण चतुर यांनी आरोपीने मानसिक आरोग्याच्या कारणास्तव दाखल केलेल्या जामीन अर्जानंतर दरम्यान, आरोपी चौधरीला अधिक चांगल्या व्यवस्थापन आणि उपचारांसाठी पुढील आदेशापर्यंत ठाणे मानसिक रुग्णालयात दाखल करण्याचे न्यायालयाने दिले. रुग्णालयाच्या वैद्यकीय अधिकाऱ्यांना दर १५ दिवसांनी आरोपीच्या उपचाराबाबत आणि मानसिक आरोग्याबाबत अहवाल सादर करण्यास सांगितले.
प्रकृती स्थिर
कारागृहाने जानेवारीत सादर केलेल्या वैद्यकीय अहवालात म्हटले होते की, १८ डिसेंबर रोजी झालेल्या तपासणीत चौधरीची प्रकृती ‘स्थिर’ आढळली होती. आरोपी चौधरी याचे रक्तदाबासह सर्व शारीरिक मापदंड सामान्य होते आणि मध्यवर्ती मज्जासंस्थेत कोणतीही तात्काळ विकृती दिसून आली नव्हती.