मुंबई : छत्रपती शिवाजी महाराज टर्मिनस (सीएसएमटी) परिसरात गुरुवारी सकाळी सिग्नल यंत्रणेशी संबंधित बिघाड झाल्याने मध्य रेल्वेची वाहतूक विस्कळीत झाली. ऐन गर्दीच्या वेळी झालेल्या या खोळंब्यामुळे हजारो प्रवाशांचे हाल झाले. रेल्वेच्या वरिष्ठ अधिकाऱ्यांनी दिलेल्या माहितीनुसार, प्लॅटफॉर्म क्रमांक ११ ते १४ दरम्यान ही घटना घडली. येथे एका इंजिनाने लाल सिग्नल ओलांडल्याने (एसपीएडी) सुरक्षेचा प्रश्न निर्माण झाला होता.
सीएसएमटी स्थानकाच्या यार्डमध्ये सकाळी ६:५० ते ७:२० च्या दरम्यान ‘अप थ्रू लाइन’वर रिकाम्या डब्यांची आणि इंजिनाची ने-आण करण्याचे काम सुरू होते. या प्रक्रियेदरम्यान सिग्नलचे उल्लंघन झाल्याने खबरदारीचा उपाय म्हणून गाड्यांच्या वाहतुकीवर तत्काळ निर्बंध आणण्यात आले. यामुळे ‘अप’ मार्गावरील गाड्या २५ ते ३५ मिनिटे उशिराने धावत होत्या. सकाळी कामावर जाणाऱ्या चाकरमान्यांना आणि उपनगरीय प्रवाशांना याचा मोठा फटका बसला. रेल्वे प्रशासनाने तत्काळ उपाययोजना केल्याने हळूहळू वाहतूक पूर्वपदावर आली. सिग्नल नियमांचे उल्लंघन नेमके कशामुळे झाले याचा सविस्तर तपास रेल्वेकडून केला जात आहे.