भाईंंदर : मीरा रोड पूर्वेकडील पूनम इस्टेट क्लस्टर-१ सहकारी गृहनिर्माण संस्थेत बकरी ईदच्या पार्श्वभूमीवर झालेल्या वादानंतर आता नवरात्रोत्सवाच्या आयोजनावरून नवा वाद निर्माण झाला आहे. नवरात्रोत्सवानिमित्त सामायिक जागेत गरबा, दांडिया व सांस्कृतिक कार्यक्रम आयोजित करण्यासाठी सुमारे १२० कुटुंबीयांनी सोसायटीकडे परवानगी मागितली होती. मात्र, सोसायटी प्रशासनाने परवानगी नाकारल्याने रहिवाशांनी आक्षेप घेत सहकारी संस्था विभागाकडे तक्रार केली आहे. दरम्यान, पोलिसांकडून मात्र नियमानुसार परवानगी दिली जाणार असल्याचे स्पष्ट करण्यात आले आहे.
रहिवाशांच्या म्हणण्यानुसार, यापूर्वी १८ जून रोजी यासंदर्भात तक्रार करण्यात आली होती. त्यावर ठाणे तालुका उपनिबंधक, सहकारी संस्था कार्यालयाने २५ जून रोजी कायदा व मंजूर उपविधींनुसार योग्य ती कार्यवाही करण्याचे निर्देश सोसायटीला दिले होते. मात्र, त्यानंतरही ठोस कार्यवाही झाली नसल्याचा आरोप रहिवाशांनी केला आहे.
दरम्यान, सोसायटी कोणत्याही धर्माच्या सणाला विरोध करत नसून, सर्वसाधारण सभेतील ठरावाची अंमलबजावणी केली जात असल्याचे पदाधिकारी रूपा पिंटो, दानिश शेख व मिनाज शेख यांनी स्पष्ट केले.
रहिवाशांचा आक्षेप
पूनम इस्टेट क्लस्टर-१ मध्ये सुमारे ६२५ सदनिका असून, विविध धर्मांचे नागरिक येथे वास्तव्यास आहेत. ११ ते २० ऑक्टोबरदरम्यान नवरात्रोत्सवासाठी सामायिक जागेत कार्यक्रम घेण्याची मागणी रहिवाशांनी केली होती. कार्यक्रमादरम्यान सोसायटीचे नियम, शासनाच्या सूचना, सुरक्षितता व स्वच्छतेच्या नियमांचे पालन केले जाईल, असेही त्यांनी स्पष्ट केले होते. या निर्णयाला उमाशंकर नाग यांच्यासह इतर रहिवाशांनी आक्षेप घेतला आहे.