अनंत चतुर्दशीच्या पार्श्वभूमीवर संपूर्ण मुंबईत शनिवारी (दि. ६) गणेश विसर्जनाची धूम होती. ढोल-ताशांचा गजर, गुलालाची उधळण, भक्तांच्या ओसंडून वाहणाऱ्या गर्दीमुळे शहरात आनंदसोहळ्याचे वातावरण होते. पावसाची सर व दहशतवादी धमकीचे सावट असूनही मुंबईकरांनी भक्तिभावाने गणपती बाप्पाला निरोप दिला.

१८ हजारांहून अधिक मूर्तींचे विसर्जन

बृहन्मुंबई महानगरपालिकेच्या माहितीनुसार, शनिवारी रात्री ९ वाजेपर्यंत शहरातील समुद्रकिनारे, तलाव आणि कृत्रिम तलावांमध्ये एकूण १८,१८६ गणेशमूर्तींचे विसर्जन करण्यात आले. यामध्ये १,०५८ सार्वजनिक मंडळांच्या मूर्ती तसेच २५८ देवीच्या मूर्तींचा समावेश आहे. विसर्जन प्रक्रियेदरम्यान कोणताही अनुचित प्रकार घडल्याचे वृत्त नाही.

मुंबईच्या गणपतींची पारंपरिक मिरवणूक

लालबाग परिसर पुन्हा एकदा विसर्जन मिरवणुकीचा केंद्रबिंदू ठरला. लालबागचा राजा, चिंचपोकळीचा चिंतामणी, गणेश गल्लीचा मुंबईचा राजा, काळाचौकीचा महागणपती, रंगारी बदक चाळ गणपती, तेजुकाया यांसारख्या मानाच्या गणपतींच्या मिरवणुका शनिवारी दुपारपासून मार्गस्थ झाल्या.

सायंकाळी लालबागमधील श्रॉफ बिल्डिंग येथे गणेशमूर्तीवर पारंपरिक पुष्पवृष्टी करण्यात आली. यावेळी दोरीच्या साहाय्याने राफेल विमानाचे मॉडेल सादर करण्यात आले, जे भाविकांसाठी आकर्षणाचे ठरले.

वाहतुकीवर मोठा परिणाम

विसर्जन मिरवणुकांमुळे ६७ ठिकाणी बस मार्ग बदलावे लागले, काही सेवा थांबवाव्या लागल्या. तरीही भाविकांच्या प्रचंड गर्दीमुळे चौपाटी, गिरगाव, दादर, जुहू आदी विसर्जन स्थळांवर उत्साहात कोणतीही कमतरता भासली नाही.

पोलिसांची कडक सुरक्षा

गणेशोत्सवाच्या शेवटच्या दिवशी सुरक्षा राखण्यासाठी २१ हजारांहून अधिक पोलिस कर्मचारी तैनात करण्यात आले. कारण, गणेश विसर्जनाच्या आदल्याच दिवशी मुंबई पोलिसांच्या व्हॉट्सॲप हेल्पलाइनवर १४ दहशतवादी, ३४ वाहनांमधून ४०० किलो आरडीएक्स घेऊन शहरात घुसल्याची धमकी मिळाली होती. या धमकीनंतर चौकशी सुरू झाली आणि अवघ्या २४ तासांत नोएडा येथील अश्विनीकुमार सुप्रा (वय ५०) याला अटक करण्यात आली. त्यानंतरही पोलिसांनी विसर्जन काळात सतर्कता वाढवली होती.

भक्तिभावाचा उत्सवमय माहोल

पावसाच्या सरी, गर्दी आणि वाहतुकीच्या अडचणी असूनही विसर्जन मार्गांवर हजारो लोक जमले होते. रस्त्यांच्या कडेने, इमारतींच्या गच्चींवर, झाडांच्या फांद्यांवर आणि खांबांवर बसून भाविकांनी आपला लाडक्या गणरायाचा विसर्जन सोहळा पाहिला. ''गणपती बाप्पा मोरया, पुढच्या वर्षी लवकर या'' या गजरात बाप्पाला निरोप देताना भक्तांच्या डोळ्यांत पाणी तर मनात अपार श्रद्धा होती.