मुंबई : अंधेरी पश्चिम येथे विरुद्ध दिशेने भरधाव दुचाकी चालवत ९ वर्षीय रेवा पवार हिला धडक देऊन फरार झालेल्या आरोपीला अखेर अंबोली पोलिसांनी अटक केली आहे. जवळपास १०० सीसीटीव्ही फुटेज, तांत्रिक तपास आणि स्थानिक माहितीच्या आधारे पोलिसांनी चार दिवसांच्या शोधमोहीमेनंतर राजस्थानातून मुख्य आरोपीला ताब्यात घेतले. मात्र, दुचाकीवरील दुसरा साथीदार अद्याप फरार असून त्याचा शोध सुरू आहे.
राजस्थानातून आरोपीला अटक
'मुंबई मिरर'ने दिलेल्या वृत्तानुसार, अटक करण्यात आलेल्या आरोपीचे नाव साबीर शेख असे आहे. पोलिसांनी त्याला राजस्थानातून ताब्यात घेतले असून मुंबईत आणण्याची प्रक्रिया सुरू आहे. या प्रकरणातील दुचाकीवरील मागे बसलेला साथीदार अद्याप फरार असून तो धारावी परिसरात लपल्याचा संशय पोलिसांना आहे.
१०० हून अधिक सीसीटीव्ही फुटेजची तपासणी
१५ जुलै रोजी रेवा पवार ही क्लासला जात असताना चुकीच्या दिशेने भरधाव येणाऱ्या दुचाकीने तिला जोरदार धडक दिली होती. अपघातानंतर चालक आणि त्याचा साथीदार घटनास्थळावरून पसार झाले होते. संबंधित दुचाकीवर क्रमांकाची प्लेट नसल्याने आरोपींचा माग काढणे पोलिसांसाठी मोठे आव्हान ठरले.
त्यानंतर अंबोली पोलिसांनी अंधेरी आणि आसपासच्या परिसरातील जवळपास १०० सीसीटीव्ही कॅमेऱ्यांचे फुटेज तपासले. तांत्रिक विश्लेषण आणि स्थानिक माहितीच्या आधारे आरोपीचा माग काढत पोलिसांनी त्याला राजस्थानातून अटक केली.
रेवाची प्रकृती स्थिर, दोन महिन्यांच्या विश्रांतीचा सल्ला
अपघातानंतर जखमी झालेल्या रेवा पवार हिला तातडीने कूपर रुग्णालयात दाखल करण्यात आले होते. उपचारानंतर तिला घरी सोडण्यात आले आहे. मात्र, डॉक्टरांनी तिला दोन महिन्यांची पूर्ण विश्रांती घेण्याचा सल्ला दिला असून मोठ्या आवाजापासून दूर राहण्यास सांगितले आहे. या अपघातामुळे तिच्या शिक्षणावरही परिणाम झाला असून ती अद्याप औषधोपचार आणि वैद्यकीय देखरेखीखाली असल्याचे तिच्या नातेवाईकांनी सांगितले.
दुसऱ्या आरोपीचा शोध सुरू
पोलिसांनी फरार साथीदाराचीही ओळख पटवली असून त्याचा शोध घेण्यासाठी स्वतंत्र पथके नियुक्त करण्यात आली आहेत. तसेच, मुख्य आरोपी साबीर शेख याच्याकडे यापूर्वी अशाच प्रकारचे गुन्हे आहेत का, याचाही तपास केला जात आहे. या प्रकरणाचा पुढील तपास अंबोली पोलीस करत आहेत.