माटुंगा पूर्व परिसरात जुन्या इमारतीच्या पाडकामादरम्यान सुरक्षेच्या मूलभूत उपाययोजनांकडे दुर्लक्ष झाल्याचा आरोप करण्यात आला आहे. लोटलीकर मार्गावरील एका इमारतीच्या पाडकामामुळे परिसरात धुळीचे मोठे लोट पसरल्याने नागरिकांनी चिंता व्यक्त केली आहे.

ही घटना ६ मे रोजी माटुंगा पूर्वेतील लोटलीकर मार्गावरील प्लॉट क्रमांक ३४ येथे घडली. येथे पुनर्विकासाचं काम सुरू असून, जुन्या इमारतीचं पाडकाम करण्यात येत होतं.

निखिल देसाई यांनी एक्स (पूर्वीचे ट्विटर) वर यासंदर्भातील छायाचित्रे शेअर केल्यानंतर ही बाब समोर आली. त्यांच्या पोस्टनुसार, पाडकामाच्या ठिकाणी कोणतीही संरक्षक जाळी लावण्यात आली नव्हती. तसेच धूळ नियंत्रणासाठी पाण्याचे टँकर किंवा स्प्रे यंत्रणाही वापरण्यात आली नाही.

परिसरात धुळीचे प्रचंड लोट

सोशल मीडियावर शेअर करण्यात आलेल्या छायाचित्रांमध्ये धुळीचे मोठे ढग परिसरात पसरताना दिसत आहेत. याचा परिणाम आसपासच्या इमारती, पादचारी आणि प्रवाशांवर झाला. सतत धुळीच्या संपर्कामुळे आरोग्यावर परिणाम होऊ शकतो, अशी भीती स्थानिक नागरिकांनी व्यक्त केली.

निखिल देसाई यांनी पालिकेच्या नियमांच्या अंमलबजावणीवरही प्रश्नचिन्ह उपस्थित केले. "बीएमसीचे नियम केवळ कागदावरच राहिले आहेत," असा आरोप त्यांनी केला.

बीएमसीकडून प्रतिक्रिया

या तक्रारीवर प्रतिक्रिया देताना बृहन्मुंबई महानगरपालिकेने (BMC) उत्तर दिले की, “आपल्याला झालेल्या गैरसोयीबद्दल दिलगीर आहोत. संबंधित विभागाला याबाबत कळविण्यात आले आहे.”