मुंबई : महाशिवरात्रीनिमित्त बुधवार, २६ फेब्रुवारी रोजी सार्वजनिक सुट्टी आहे. त्यामुळे येत्या बुधवारी भायखळा येथील राणी बाग (वीरमाता जिजाबाई भोसले वनस्पती उद्यान व प्राणिसंग्रहालय) पर्यटकांसाठी खुली राहणार आहे. दुसऱ्या दिवशी म्हणजे गुरुवार, २७ फेब्रुवारी रोजी राणी बाग बंद राहणार असल्याची माहिती बृहन्मुंबई महानगरपालिकेने दिली.

भायखळा परिसरातील राणी बाग साप्ताहिक सुट्टीनिमित्त दर बुधवारी बंद असते. मात्र, मुंबई महानगरपालिकेने यापूर्वी मंजूर केलेल्या एका ठरावानुसार बुधवारी सार्वजनिक सुट्टी आल्यास त्यादिवशी उद्यान व प्राणिसंग्रहालय पर्यटकांसाठी खुले राहते आणि त्याच्या दुसऱ्या दिवशी बंद ठेवण्यात येते. त्यानुसार बुधवार, २६ फेब्रुवारी रोजी ‘महाशिवरात्री’निमित्त राणी बाग जनतेसाठी खुली राहणार आहे.