मुंबईकरांचा प्रवास आणखी सोपा करण्यासाठी मुंबई मेट्रो लाईन ३ने महत्त्वाचे पाऊल उचलले आहे. विधान भवन मेट्रो स्थानकाच्या ए-२ गेटवरील लिफ्ट सुविधा सुरू करण्यात आली आहे. त्यामुळे प्रवाशांना स्थानकात येणं-जाणं अधिक सोपं होणार आहे. ज्येष्ठ नागरिक, दिव्यांग प्रवासी आणि रोज प्रवास करणाऱ्यांना याचा विशेष फायदा होणार आहे.

मुंबई मेट्रो लाईन ३च्या अधिकृत सोशल मीडिया हँडलवरून ही माहिती देण्यात आली. त्यानुसार, ए-२ गेट आता प्रवेश आणि बाहेर पडण्यासाठी दोन्हींसाठी खुले करण्यात आले आहे. या सुविधेमुळे दक्षिण मुंबईतील या महत्त्वाच्या स्थानकावर प्रवाशांची हालचाल अधिक सुरळीत होण्याची अपेक्षा आहे.

कोणत्या ठिकाणी थेट पोहोचता येणार?

ए-२ गेटमधून मनोरा – नवीन आमदार निवास आणि वाय. बी. चव्हाण सेंटरकडे थेट जाता येते. या भागात नेहमीच मोठी वर्दळ असते. त्यामुळे हे गेट सुरू झाल्याने इतर प्रवेशद्वारांवरील गर्दी काही प्रमाणात कमी होण्यास मदत होणार आहे.

बी-५ गेट अजूनही बंद

यापूर्वी याच स्थानकावरील बी-४ गेटही पुन्हा सुरू करण्यात आले होते. मात्र, बी-५ गेट अजूनही बंद असून ते २५ मार्चपासून पुन्हा सुरू होणार आहे. राज्याच्या अर्थसंकल्पीय अधिवेशनामुळे सुरक्षेच्या कारणास्तव काही गेट तात्पुरते बंद ठेवण्यात आले होते.

प्रवाशांना सूचना

स्थानकातील काही प्रवेशमार्गांवर अजूनही मर्यादित प्रवेश असल्याने, विशेषतः गर्दीच्या वेळेत प्रवासाचे आधीच नियोजन करून निघावे, असे आवाहन करण्यात आले आहे.

महत्त्वाच्या ठिकाणांना जोडणारे स्थानक

विधान भवन मेट्रो स्थानक हे दक्षिण मुंबईतील महत्त्वाचे स्थानक मानले जाते. या स्थानकातून महाराष्ट्र विधान भवन, मित्तल टॉवर्स, स्टेट बँक ऑफ इंडिया मुख्यालय, सचिवालय जिमखाना, कूपरेज फुटबॉल मैदान आणि फ्री प्रेस हाऊस या महत्त्वाच्या ठिकाणी जाता येते.