मुंबई : पाच वर्षाच्या मुलासमोर पत्नीची निघृण हत्या करणारा दातांचा डॉक्टर उमेश बोबळे या आरोपीला मुंबई सत्र न्यायालयाने जन्मठेपेची शिक्षा ठोठावली. सत्र न्यायाधीश पी. पी. बनकर यांनी पाच वर्षाच्या मुलाच्या साक्षीसह शेजारी आणि तपास अधिकाऱ्याची साक्ष ग्राह्य धरून बोबळे याला दोषी ठरवत जन्मठेपेची शिक्षा ठोठावली.
दादर परिसरात राहणाऱ्या डॉ. उमेश बोबळे आणि त्यांच्या पत्नीने सहा वर्षांपूर्वी घटस्फोटासाठी कायदेशीर प्रक्रिया सुरू केली होती. त्यात पोटगीच्या मुद्द्यावरून दोघांमध्ये जोरदार भांडण झाले. त्यातूनच डिसेंबर २०१६ मध्ये उमेशने आपल्या पाच वर्षांच्या मुलासमोर पत्नी तनुजा हिच्यावर घरातील चाकूने ३४ वार केले. त्यात गंभीर दुखापत होऊन तनुजाचा मृत्यू झाला. या प्रकरणी बोबळे याला अटक करून गुन्हा दाखल करण्यात आला होता.
या खटल्यावर सत्र न्यायाधीश पी. पी. बनकर यांच्यासमोर सुनावणी झाली. यावेळी विशेष सरकारी वकील रामनाथ किधी यांनी उमेश हा तनुजाच्या चारित्र्यावर संशय घ्यायचा, तनुजा गरोदर राहिली होती त्यावेळी त्याने डीएनए टेस्टसाठी आग्रह धरला होता, पोटातील बाळ आपलेच असल्याचे सिद्ध करून घेण्यासाठी उमेशने डीएनए टेस्टसाठी तनुजावर सक्ती केली होती, याकडे न्यायालयाचे लक्ष वेधले. प्रत्यक्षदर्शी साक्षीदार असलेल्या पाच वर्षांच्या मुलासह अन्य दहा साक्षीदारांची साक्ष नोंदवण्यात आली. त्याची गंभीर दखल घेत अतिरिक्त सत्र न्यायाधीश बनकर यांनी आरोपी उमेश बोबळेला २० हजारा रुपयांच्या दंडासह जन्मठेपेची शिक्षा ठोठावली.