मुंबई : एखादी व्यक्ती तृतीयपंथी (ट्रान्सजेंडर) असली तरीही ती स्वतःची ओळख महिला म्हणून सांगत असल्यास, तिच्या बाबतीत भारतीय न्याय संहितेच्या (बीएनएस) कलम ७५ अंतर्गत महिलांचा विनयभंग केल्याचा गुन्हा दाखल केला जाऊ शकतो, असा महत्त्वाचा निर्णय मुंबई उच्च न्यायालयाने दिला आहे.
विवाहाचे आमिष दाखवून एका तृतीयपंथी महिलेचे लैंगिक शोषण केल्याचा आरोप असलेल्या विशाल इंगळे या भारतीय लष्करातील 'अग्निवीर'चा दोषमुक्तीचा (डिस्चार्ज) अर्ज न्यायमूर्ती मेहरोज पठाण यांनी ३ नोव्हेंबरला फेटाळून लावला. पोलिसांनी इंगळेविरुद्ध बीएनएसच्या कलम ७५ (महिलांच्या विनयभंगाशी संबंधित), कलम २९६ (अश्लीलता) आणि तृतीयपंथी व्यक्ती (हक्कांचे संरक्षण) कायदा, २०१९ च्या संबंधित कलमांनुसार गुन्हा दाखल केला होता.
आपल्याविरुद्ध कलम ७५ लावण्याला इंगळेने न्यायालयात आव्हान दिले होते. तक्रारदार ही तृतीयपंथी व्यक्ती असून ती 'महिला' नाही, असा युक्तिवाद त्याने केला होता. मात्र, तक्रारदाराने स्वतःची ओळख महिला म्हणून दर्शवली असून आपल्या लैंगिक ओळखीनुसार शरीरात बदल घडवून आणण्यासाठी ती हार्मोनल उपचार घेत असल्याचे न्यायालयाने निदर्शनाला आणून दिले.