मुंबई : झाडांच्या फांद्यामुळे अपघात होण्याचा धोका लक्षात घेता, मुंबईतील उड्डाणपुलावर लटकणाऱ्या झाडांच्या फांद्यांची छाटणी करण्याची मोहीम पालिकेच्या उद्यान विभागाने हाती घेतली आहे. रविवारपर्यंत ही मोहीम फत्ते करण्याचे उद्दीष्ट उद्यान विभागाचे आहे.
मुंबईतील रस्ते अपघात टाळण्यासाठी पालिका आयुक्तांच्या निर्देशानुसार पालिकेच्या उद्यान विभागाने उड्डाणपुलावर लटकणाऱ्या झाडांच्या फांद्यांची छाटणी करण्याची मोहीम हाती घेतली आहे. नागरिकांच्या व विशेषत: मुंबई शहरातील दुचाकी वाहनचालकांच्या सुरक्षतेकरिता ही विशेष मोहिम हाती घेण्यात आली आहे. ही मोहीम रविवारपर्यंत फत्ते करण्याचे उद्दिष्ट आहे. उड्डाणपुलावरील धोकादायक फांद्यांची छाटणी करताना वाहतूककोंडी होऊ नये, यासाठी मनुष्यबळ तैनात केले आहे. तरीही वाहनचालकांनी पालिकेच्या या मोहिमेला सहकार्य करावे, असे आवाहन केल्याचे उद्यान अधीक्षक जितेंद्र परदेशी यांनी केले आहे.
या पुलांवर फांद्या छाटणीची मोहीम
लालबाग, जे.जे. नानालाल मेहता, सायन, विलेपार्ले पश्चिम उड्डाणपूल, गोवंडी, गोरेगाव मुलुंड लिंक रोड, मालाड उड्डाणपूल या उड्डाणपुलावरील फांद्यांची छाटणी करण्यात येत आहे.