मुंबई : वडाळा - कासारवडवली या मेट्रो ४ प्रकल्पाच्या स्थापत्य कामात तब्बल १२७४.८० कोटी रुपयांची वाढ झाली आहे. प्रकल्पाला ५ वर्षांची दिरंगाई झाली आहे. त्यामुळे या प्रकल्पाला ऑगस्ट २०२६ ची नवीन डेडलाईन देण्यात आली आहे.

आरटीआय कार्यकर्ते अनिल गलगली यांनी मेट्रो प्रकल्प अंमलबजावणी शाखेकडे विविध माहिती विचारली होती. मेट्रो प्रकल्प अंमलबजावणी शाखेने अनिल गलगली यांना माहिती उपलब्ध करून दिली आहे. मुंबई मेट्रो मार्ग- ४ वडाळा ते कासारवडावलीचे काम १२ एप्रिल २०१८ रोजी दोन कंपन्यांना देण्यात आले होते. वडाळा ते कासारवडवली मेट्रो मार्ग ४ हा ३२ किमी लांबीचा उन्नत मार्ग आहे. या मार्गामध्ये एकूण ३० स्थानके आहेत. हे काम जुलै २०२१ रोजी पूर्ण करणे अपेक्षित होते. मात्र या प्रकल्पाला दिरंगाई झाल्याने प्रकल्प खर्चात वाढ झाली आहे. त्यामुळे हा प्रकल्प पूर्ण करण्याची मुदत ऑगस्ट २०२६ पर्यंत देण्यात आली आहे.

मेट्रो ४ प्रकल्पाचा अपेक्षित खर्च २६३२.२५ कोटी इतका होता. आता यात १२७४.८० कोटींची लक्षणीय वाढ झाली आहे. खर्चात वाढ आणि ५ वर्षांची दिरंगाई लक्षात घेता कंत्राटदार कंपनीवर दंडात्मक कारवाई केली नसल्याने आश्चर्य व्यक्त करण्यात येत आहे.