नवी दिल्ली : भारतीय रिझर्व्ह बँकेने शुक्रवारी जाहीर केलेल्या द्वैमासिक पतधोरणात मुख्य व्याजदरात पाव टक्का कपात केल्यानंतर आता बँकांकडून हा लाभ ग्राहकांना देण्याचे सुरू केले आहे. बँक ऑफ महाराष्ट्रने रविवारी तर पीएनबी, बँक ऑफ इंडिया आणि इंडियन बँकेने व्याजदरात कपातीची घोषणा केली. त्यामुळे कर्जदारांचा हप्ता कमी होऊन त्यांना दिलासा मिळणार आहे.
बँक ऑफ महाराष्ट्रकडून किरकोळ कर्जाच्या व्याजदरात पाव टक्का घट
सार्वजनिक क्षेत्रातील बँक ऑफ महाराष्ट्र (बीओएम)ने रविवारी आरबीआयच्या व्याजदर कपातीनुसार गृह, कार, शिक्षण आणि रेपो लिंक्ड लेंडिंग रेट (आरएलएलआर) शी संबंधित इतर कर्जांसह किरकोळ कर्जावरील व्याजदर २५ आधार अंकांनी कमी करण्याची घोषणा केली.
शनिवारपासून लागू होणाऱ्या या सुधारणेसह, बँकेचे गृह कर्ज ७.१० टक्के व्याजदरापासून आणि कार कर्ज ७.४५ टक्के पासून सुरू होईल, जे बँकिंग उद्योगातील सर्वात कमी आहे, असे बीओएमने एका निवेदनात म्हटले आहे.
रिझर्व्ह बँक ऑफ इंडियाने शुक्रवारी पुनर्खरेदी किंवा रेपो दर २५ आधार अंकांनी कमी करून ५.२५ टक्के केला आणि तटस्थ भूमिका कायम ठेवली, ज्यामुळे पुढील व्याजदर कपातीसाठी वाव मिळाली.
कमी व्याजदरांचा हा फायदा बँकेच्या सर्व ग्राहकांना सर्वोत्तम वित्तपुरवठा उपाय प्रदान करण्याची आणि त्यांची स्वप्ने पूर्ण करण्यास मदत करण्याची वचनबद्धता दर्शवितो. सध्याच्या उच्च व्याजदराच्या परिस्थितीत स्वस्त कर्ज देऊन बँक ग्राहकांना आनंद आणण्यासाठी किरकोळ कर्जे स्वस्त करत आहे, असे निवेदनात म्हटले आहे.
पीएनबीची व्याजदर कपात: ईएमआय झाला कमी
सरकारी बँक पंजाब नॅशनल बँक (पीएनबी)ने आपल्या ग्राहकांना मोठा दिलासा दिला आहे. आरबीआयने शुक्रवारी रेपो दरात २५ आधार अंकांनी (बीपीएस) कपात केल्यानंतर अवघ्या एका दिवसात, पीएनबीने आपला रेपो-लिंक्ड लेंडिंग रेट (आरएलएलआर) कमी केला. बँकेने शनिवार, ६ डिसेंबर रोजी स्टॉक एक्स्चेंजला कळवले की त्यांचा आरएलएलआर ८.३५ टक्क्यांवरून ८.१० टक्क्यांपर्यंत कमी करण्यात आला आहे. तथापि, बँकेने स्पष्ट केले की एमसीएलआर आणि बेस रेटमध्ये कोणताही बदल करण्यात आलेला नाही.
बँकेने तत्काळ प्रभावाने त्यांचा आरएलएलआर सुधारित केला आहे. आरएलएलआरमध्ये २५ आधार अंकांनी कपात केल्याने ग्राहकांचा ईएमआय कमी होईल, परंतु केवळ रेपो-लिंक्ड फ्लोटिंग रेट होम लोन असलेल्यांसाठी. आरएलएलआर रीसेट कालावधी सामान्यतः तीन महिने असल्याने, ज्या ग्राहकांना ऑक्टोबरमध्ये ईएमआय रीसेट केले गेले होते त्यांना जानेवारी २०२६ पासून सवलत मिळेल.
बँक ऑफ इंडियाचीही व्याजदर कपात, ईएमआय स्वस्त
पीएनबीच्या निर्णयापूर्वी, बँक ऑफ इंडिया आणि इंडियन बँकेनेही त्यांचे रेपो-लिंक्ड दर कमी केले. इंडियन बँकेने त्यांचे आरएलएलआर ८.२० टक्क्यांवरून ७.९५ टक्क्यांपर्यंत कमी केले. रेपो दरात कपात होताच बँकांनी त्याचा लाभ ग्राहकांना दिल्याचे जाहीर केल्याने गृहकर्ज ईएमआय स्वस्त होणार आहे.