देशात एलपीजीच्या तुटवड्याची चर्चा सुरू असताना बंगळुरूमधील एका कॅफेच्या बिलाचा फोटो सोशल मीडियावर मोठ्या प्रमाणात व्हायरल झाला आहे. या बिलामध्ये लिंबूपाण्यावर "गॅस क्रायसिस चार्ज" नावाने अतिरिक्त शुल्क आकारण्यात आल्याचे दिसत असल्याने नेटिझन्समध्ये चर्चेला उधाण आले आहे.
लिंबूपाण्यावरही गॅस चार्ज...
सोशल मीडिया प्लॅटफॉर्म 'एक्स'वरील एका युजरने बंगळुरूमधील 'Theo Cafe'च्या बिलाचा फोटो शेअर केला. या बिलानुसार दोन मिंट लिंबूपाणी प्रत्येकी १७९ रुपये या दराने मागवण्यात आले होते. दोन्ही पेयांची एकूण किंमत ३५८ रुपये झाली.
बिलावर सुरुवातीला १७.९० रुपयांची सवलत देण्यात आली. त्यानंतर नेहमीप्रमाणे २.५ टक्के सीजीएसटी आणि २.५ टक्के एसजीएसटी आकारण्यात आले. मात्र यासोबतच "गॅस क्रायसिस चार्ज" या नावाने १७.०१ रुपये अतिरिक्त आकारण्यात आले. त्यामुळे अंतिम बिल ३७४ रुपयांपर्यंत पोहोचले.
सोशल मीडियावर विनोदी प्रतिक्रिया
हे बिल व्हायरल झाल्यानंतर सोशल मीडियावर अनेकांनी विनोदी प्रतिक्रिया दिल्या. काहींनी "लिंबूपाणी बनवताना गॅस लागतो का?" असा सवाल उपस्थित केला, तर काहींनी या अतिरिक्त शुल्कावर टोमणे मारले.
एलपीजी तुटवड्याचा परिणाम
दरम्यान, देशात व्यावसायिक एलपीजी सिलिंडरच्या पुरवठ्यात अडथळे येत असल्याच्या तक्रारी समोर येत आहेत. त्यामुळे अनेक हॉटेल्स, रेस्टॉरंट्स आणि सार्वजनिक कॅन्टीनना अडचणींचा सामना करावा लागत आहे.
काही ठिकाणी रेस्टॉरंट्सनी मेन्यूमधील काही पदार्थ तात्पुरते बंद केले आहेत, तर काहींनी पर्यायी इंधनांचा वापर सुरू केला आहे. काही भागांत एलपीजी वितरण केंद्रांबाहेर सिलिंडरसाठी लांबच लांब रांगा लागल्याच्याही बातम्या समोर आल्या आहेत.