पाटणा : पाकिस्तानातील दहशतवादी संघटना जैश-ए-मोहम्मदचे तीन दहशतवादी नेपाळमार्गे बिहारमध्ये घुसल्याची माहिती गुप्तचर यंत्रणांना मिळाल्याने बिहार पोलिस मुख्यालयाने राज्यात हाय अलर्ट जारी केला आहे. या दहशतवाद्यांची ओळख पटली असून त्यांची नावे हसनैन अली (रावळपिंडी), आदिल हुसेन (उमरकोट) आणि मोहम्मद उस्मान (बहावलपूर) अशी आहेत. पोलिसांनी या दहशतवाद्यांची रेखाचित्रेही जारी केली आहेत. पोलिसांच्या माहितीनुसार, रावळपिंडीमधील हसनैन अली, उमरकोट येथील आदिल हुसेन आणि बहावलपूर येथील मोहम्मद उस्मान अशी या तीन दहशतवाद्यांची नावे आहेत.

ते ऑगस्टच्या दुसऱ्या आठवड्यात काठमांडूला पोहोचले होते आणि गेल्या आठवड्यात त्यांनी बिहारमध्ये प्रवेश केला. त्यामुळे नेपाळ सीमेला लागून असलेल्या भागातील सीसीटीव्ही कॅमेरे स्कॅन केले जात आहेत. सुरक्षा यंत्रणांना गस्त वाढविण्याचे आणि गुप्त सूचना गोळा करण्याच्या सूचना देण्यात आल्या आहेत. जिल्ह्याच्या गुप्तचर विभागांना प्रत्येक संशयास्पद हालचालींवर लक्ष ठेवले जात आहे.

गस्त वाढविली

बिहारमध्ये 'ऑपरेशन सिंदूर 'नंतर आणि आगामी विधानसभा निवडणुकीचा कार्यक्रम लक्षात घेता भारत-नेपाल सीमाभाग आणि सीमांचल जिल्ह्यांत सुरक्षा वाढविण्याचे आदेश देण्यात आलेले आहेत. मधुबनी, सीतामढी, सुपौल, अररिया, पूर्व आणि पश्चिम चंपारण जिल्ह्यांसह सीमावर्ती भागात गस्त वाढविण्यात आली आहे. बिहार आणि नेपाळ यांच्यात ७२९ किमींची विस्तीर्ण अशी सीमा आहे. घुसखोरी आणि सीमेपलीकडून होणाऱ्या हालचालींसाठी बिहार हे एक प्रमुख केंद्र बनले आहे. राज्यातील सात जिल्हे खुल्या सीमेवर वसलेले आहेत. त्यामुळे या भागात सतत देखरेख आणि सुरक्षा पुरविण्याचे मोठे आव्हान पोलिसांसमोर असते.

यंत्रणा सक्रिय

बिहारमधील विधानसभा निवडणुकीच्या पार्श्वभूमीवर पोलीस आणि सुरक्षा यंत्रणा सतर्क आहेत. कोणत्याही संशयास्पद व्यक्ती किंवा हालचालींबद्दल तत्काळ पोलिसांना माहिती देण्याचे आवाहन पोलीस मुख्यालयाने सर्वसामान्यांना केले आहे. गुप्त माहिती गोळा करण्यासाठी आणि संशयित दहशतवाद्यांवर योग्य कारवाई करण्यासाठी पोलीस मुख्यालयाने सर्व जिल्ह्यांची गुप्तचर यंत्रणा सक्रिय केली आहे.