जबलपूर : भाजपला कमलनाथ यांची गरज नाही आणि आमचे दरवाजे त्यांच्यासाठी बंद आहेत, असे स्पष्ट सांगत मध्य प्रदेशचे मंत्री कैलाश विजयवर्गीय यांनी कमलनाथ यांच्या भाजप प्रवेशाच्या अटकळींसंबंधात पडदा पाडला आहे. यामुळे आता ७७ वर्षांच्या ज्येष्ठ काँग्रेस नेते कमलनाथ यांच्या पुढील राजकीय वाटचालीबद्दल आणखी संशयकल्लोळ निर्माण झाला आहे.

पत्रकारांशी बोलताना विजयवर्गीय यांनी ही माहिती दिली. माजी खासदार व मध्य प्रदेशचे माजी मुख्यमंत्री कमल नाथ आणि त्यांचे खासदार पुत्र नकुल नाथ गेल्या आठवड्यात नवी दिल्लीत पोहोचल्यापासून भाजप प्रवेशाबद्दल अटकळ सुरू आहे. तथापि, नाथांचे विश्वासू सज्जन सिंग वर्मा यांनी ७७ वर्षीय काँग्रेसचे दिग्गज नेते भाजपमध्ये प्रवेश करणार असल्याच्या वृत्ताचा इन्कार केला होता. दरम्यान, कमलनाथ पुढच्या राजकीय वाटचालीबाबत ‘सस्पेंस’ असताना, त्यांच्या छिंदवाडा जिल्ह्यातील पक्षाच्या अनेक स्थानिक नेत्यांनी बुधवारी भाजपमध्ये प्रवेश केला.