नवी दिल्ली : दिल्ली हॉस्टेल इमारत दुर्घटनेप्रकरणी सोमवारी पोलिसांनी हॉस्टेलचा मालक हरिराम बन्सल याला राजस्थानमधील भिवाडी येथून ताब्यात घेतले आहे. पोलिसांनी त्याच्याविरुद्ध लुकआऊट नोटीस जारी केली होती. या दुर्घटनेत आतापर्यंत ७ लोकांचा मृत्यू झाला आहे, तर १२ लोकांना वाचवण्यात आले आहे. त्यापैकी ५ जणांची प्रकृती गंभीर आहे. बचावकार्य पूर्ण झाले आहे.
दरम्यान याप्रकरणी उच्च न्यायालयात सोमवारी सुनावणी झाली. यावेळी दिल्ली उच्च न्यायालयाने, या दुर्घटनेसाठी दिल्ली महानगरपालिका आणि दिल्ली विद्यापीठ हे दोन्ही जबाबदार आहेत, असे न्यायालयाने म्हटले आहे.
तसेच बाहेरून शिक्षणासाठी येणाऱ्या विद्यार्थ्यांच्या वसतिगृहांची स्थिती अत्यंत दयनीय आणि खराब आहे. सरकार जबाबदारीतून पळ काढू शकत नाही. न्यायालयाने एमसीडी, दिल्ली सरकार, केंद्र सरकार, एनएचआरसी आणि दिल्ली विद्यापीठाला १० दिवसांच्या आत आपले उत्तर दाखल करण्याचे निर्देश दिले आहेत.