जम्मू-काश्मीरच्या पहलगाम येथे झालेल्या भ्याड दहशतवादी हल्ल्यात २६ निष्पाप पर्यटकांचा मृत्यू झाल्यानंतर भारताने पाकिस्तानविरोधात आक्रमक पवित्रा घेतला आहे. या पार्श्वभूमीवर केंद्रीय गृहमंत्री अमित शहा यांनी सर्व राज्यांच्या मुख्यमंत्र्यांशी संवाद साधून पाकिस्तानी नागरिकांविषयी महत्त्वाच्या सूचना दिल्या आहेत.
वृत्तसंस्था एएनआयने दिलेल्या वृत्तानुसार, शुक्रवारी केंद्रीय गृहमंत्री अमित शहा यांनी सर्व राज्यांच्या मुख्यमंत्र्यांशी दूरध्वनीद्वारे संपर्क साधला. तुमच्या राज्यांमध्ये असलेल्या पाकिस्तानी नागरिकांना शोधा आणि त्यांना तातडीने परत पाठवण्यासाठी आवश्यक पावले उचला, अशा स्पष्ट सूचना शहा यांनी सर्व मुख्यमंत्र्यांना दिल्या.
दरम्यान, बुधवारी पंतप्रधान नरेंद्र मोदी यांच्या अध्यक्षतेखाली झालेल्या सुरक्षाविषयक कॅबिनेट समितीच्या बैठकीत पाकिस्तानवर कायदेशीर स्ट्राइक करण्यासाठी काही मोठे निर्णय घेतले आहेत. भारताने १९६० चा सिंधू नदीच्या पाणी वाटपाचा करार स्थगित केलाय. तसेच, अटारी सीमा बंद केली आहे. यामार्गे आलेल्या पाकिस्तानी नागरिकांना १ मे २०२५ पर्यंत यामार्गाने भारत सोडण्याचे आदेश दिलेत. याशिवाय, सार्क व्हिसा योजनेअंतर्गत पाकिस्तानी नागरिकांना मिळालेला व्हिसा रद्द करुन त्यांना भारत सोडण्यासाठी ४८ तासांची मुदत देण्यात आली आहे.