परराष्ट्र मंत्रालयाने (MEA) भारतीय नागरिकांना इराणमध्ये नोकरीच्या खोट्या आश्वासनांपासून सावध राहण्याचा कडक इशारा दिला आहे. अलीकडच्या काळात अनेक प्रकरणांमध्ये भारतीयांना नोकरीसाठी तिसऱ्या देशात पाठवले जाईल असे सांगून इराणला नेण्यात आले. मात्र, तेथे पोहोचल्यानंतर गुन्हेगारी टोळ्यांकडून त्यांच्या अपहरणाच्या घटना समोर आल्या आहेत. या टोळ्या नंतर त्यांच्या सुटकेसाठी त्यांच्या कुटुंबियांकडून खंडणीची मागणी करत असल्याचेही उघड झाले आहे.

आकर्षक ऑफरमधून फसवणूक

मंत्रालयाच्या माहितीनुसार, काही एजंट आकर्षक नोकरीच्या ऑफर देतात. त्यात परदेशातील चांगल्या पगाराच्या संधींचे आश्वासन दिले जाते. या प्रक्रियेत एजंट सांगतात की इराणमार्गे नोकरीसाठी सहज जाता येते. मात्र, इराण सरकार फक्त पर्यटनाच्या उद्देशाने भारतीयांना व्हिसा-मुक्त प्रवेश देते. रोजगारासाठी कोणताही व्हिसा-मुक्त प्रवेश लागू नाही. त्यामुळे अशा प्रकारे दिले जाणारे आश्वासन हे पूर्णपणे बनावट असून ते गुन्हेगारी टोळ्यांशी संगनमताचे असू शकते.

भारतीय नागरिकांना इशारा

परराष्ट्र मंत्रालयाने सांगितले की, अशा फसव्या नोकरीच्या ऑफरमुळे नागरिकांचे प्राण धोक्यात येऊ शकतात. त्यामुळे भारतीयांनी परदेशातील रोजगाराच्या ऑफर्स स्वीकारताना कठोर दक्षता घ्यावी. कोणत्याही एजंटकडून मिळणाऱ्या आश्वासनांवर न विचारता विश्वास ठेवू नये, तसेच अशा ऑफर्स पडताळून पाहिल्याशिवाय त्यांना मान्यता देऊ नये.

सरकारचा स्पष्ट सल्ला

• इराणला जाणाऱ्या भारतीयांनी रोजगाराच्या बनावट ऑफर्सना बळी पडू नये.

• फक्त पर्यटनासाठीच व्हिसा-मुक्त प्रवेश उपलब्ध आहे.

• रोजगार किंवा इतर कारणांसाठी व्हिसा-मुक्त प्रवेशाचे आश्वासन देणारे एजंट हे फसवणूक करत आहेत.

• नागरिकांनी कोणतीही शंका असल्यास थेट परराष्ट्र मंत्रालयाशी किंवा अधिकृत सरकारी यंत्रणेशी संपर्क साधावा.