नवी दिल्ली : केंद्रीय अर्थमंत्री निर्मला सीतारामन यांनी मंगळवारी सार्वजनिक क्षेत्रातील बँकांना २ ऑक्टोबर २०२६ पासून 'बँकिंग फॉर यूथ' ही महिनाभराची विशेष मोहीम सुरू करण्याचा विचार करण्याचे निर्देश दिले आहेत. 'पीएसबी कॉन्फ्लुअन्स २०२६' या परिषदेच्या दुसऱ्या दिवशी बोलताना त्यांनी सरकारी बँकांनी भारतातील तरुणांशी अधिक मजबूत आणि दीर्घकालीन नातेसंबंध निर्माण करण्याचे आवाहन केले.
अर्थमंत्र्यांनी सांगितले की, ही मोहीम वित्तीय सेवा विभाग आणि इंडियन बँक्स असोसिएशन यांच्या समन्वयाने राबवली जाऊ शकते. १६ वर्षांवरील तरुण नागरिकांपर्यंत पोहोचून त्यांना त्यांच्या आर्थिक प्रवासाच्या सुरुवातीलाच औपचारिक बँकिंग व्यवस्थेशी जोडणे हा यामागचा मुख्य उद्देश आहे. तरुणांनी बँकेच्या शाखांमध्ये येण्याची वाट न पाहता बँकांनी थेट महाविद्यालये, विद्यापीठे आणि कौशल्य विकास केंद्रांपर्यंत पोहोचावे, असे त्यांनी सुचवले.
जीवनशैलीशी निगडित फायदे : बँकांनी तरुणांना फिटनेस सेंटर्स, योग सेंटर्स, मानसिक आरोग्य प्लॅटफॉर्मचे कूपन्स, व्हाऊचर्ससारखे लाइफस्टाईल फायदे द्यावेत.
युवा किऑस्क : बँकांच्या भौतिक शाखांमध्ये 'युवा किऑस्क' किंवा 'युवा बँकिंग मित्र' यांसारखी स्वतंत्र जागा तयार करावी.