नवी दिल्ली : राज्यसभेचे सभापती जगदीप धनखड हे पदाचा दुरुपयोग करीत असल्याचा आरोप राज्यसभेतील विरोधी पक्षनेते मल्लिकार्जुन खर्गे यांनी गुरुवारी केला आणि सभापतींच्या नि:पक्षपातीपणावरच प्रश्नचिन्ह उपस्थित केले. लोकशाही पायदळी तुडविणे ही राज्यसभेत आता प्रथाच बनली आहे, असेही खर्गे यांनी म्हटले आहे.
सार्वजनिक हिताच्या प्रश्नावर चर्चा करण्यास अनुमती न देण्यासह अन्य मुद्द्यांवरही आडमुठी भूमिका घेऊन धनखड सातत्याने विरोधकांच्या अभिव्यक्ती स्वातंत्र्यावर गदा आणत आहेत. धनखड हे पक्षपाती असल्याचा आरोप करून त्यांच्याविरुद्ध अविश्वासाचा प्रस्ताव सादर केल्यानतंर दोन दिवसांनी खर्गे यांनी धनखड यांच्यावर टीकास्र सोडले आहे.
धनखड पक्षपात करीत असले तरी आम्ही त्यापुढे झुकणार नाही, आम्ही प्रत्येक नागरिकाच्या लोकशाही हक्कासाठी आणि घटनेच्या रक्षणासाठी लढा देत राहू, असेही ते म्हणाले.