नवी दिल्ली : केंद्र सरकारने मंगळवारी ६०,००० कोटी रुपयांच्या ‘पंतप्रधान कौशल्य आणि सुधारित आयटीआयद्वारे रोजगारक्षमता परिवर्तन’ म्हणजेच पीएम-सेतू योजनेच्या देशव्यापी अंमलबजावणीला मंजुरी दिली आहे.

याअंतर्गत देशभरातील २०० औद्योगिक प्रशिक्षण संस्था क्लस्टर्सचा विकास केला जाणार असून, पहिल्या टप्प्यात ₹ १,२३७.५८ कोटी मूल्यांच्या धोरणात्मक गुंतवणूक आराखड्यांना मंजुरी देण्यात आली आहे.

कौशल्य विकास आणि उद्योजकता मंत्रालयाच्या सचिव देवाश्री मुखर्जी यांच्या अध्यक्षतेखाली झालेल्या राष्ट्रीय सुकाणू समितीच्या चौथ्या बैठकीत हा महत्त्वाचा निर्णय घेण्यात आला.

केंद्रीय मंत्र्यांचे आवाहन

कौशल्य विकास आणि उद्योजकता मंत्री जयंत चौधरी यांनी आयटीआयच्या आधुनिकीकरणासाठी जास्तीत जास्त उद्योग क्षेत्रातील दिग्गजांनी पुढे येण्याचे आवाहन केले आहे.

मी देशातील आणखी उद्योग नेत्यांना आवाहन करतो की, त्यांनी पुढे यावे आणि आपल्या आयटीआय संस्थांना जागतिक दर्जाच्या संस्थांमध्ये बदलण्यासाठी योगदान द्यावे, असे जयंत चौधरी, केंद्रीय कौशल्य विकास आणि उद्योजकता मंत्री एक्सवरील पोस्टमध्ये म्हटले आहे.

देशव्यापी अंमलबजावणी आणि सुलभता

बैठकीत घेण्यात आलेल्या इतर महत्त्वाच्या निर्णयांमध्ये खालील बाबींचा समावेश आहे :

पायलट ते पॅन-इंडिया प्रवास : समितीने पीएम-सेतू योजनेचा प्रायोगिक टप्पा यशस्वीरीत्या पूर्ण करून आता सर्व चिन्हांकित २०० आयटीआय क्लस्टर्समध्ये देशव्यापी अंमलबजावणीला मंजुरी दिली आहे. यामुळे राज्ये आणि केंद्रशासित प्रदेश उद्योगांच्या तयारीनुसार आणि स्वतःच्या क्षमतेनुसार याची अंमलबजावणी करू शकतील.

सुलभ प्रक्रिया आणि सार्वजनिक उपक्रमांचा सहभाग : योजनेची अंमलबजावणी अधिक सोपी करणे, उद्योगांचा सहभाग वाढवणे, सार्वजनिक क्षेत्रातील उपक्रमांना प्रोत्साहन देणे आणि पीएम-सेतूला बळकट करण्यासाठी संस्थात्मक परिसंस्था विस्तारण्यास या आराखड्यांतर्गत मान्यता देण्यात आली आहे.

पीएम-सेतू

एकूण तरतूद - ₹ ६०,००० कोटी

मंजूर गुंतवणूक आराखडा - ₹ १,२३७.५८ कोटी

एकूण लक्ष्य - २०० आयटीआय क्लस्टर्स

प्रमुख उद्दिष्ट - पायाभूत सुविधांचे आधुनिकीकरण, भविष्यासाठी पूरक अभ्यासक्रम रोजगार वाढवणे

संबंधित राज्य सुकाणू समित्यांनी शिफारस केलेल्या या गुंतवणूक आराखड्यांमुळे देशभरातील आयटीआय क्लस्टर्सचा उद्योग-नेतृत्वाखालील कायापालट होण्याचा मार्ग मोकळा झाला आहे. यामध्ये प्रमुख अँकर इंडस्ट्री पार्टनर्स म्हणून खालील कंपन्या जोडल्या गेल्या आहेत :

ओदिशा : जिंदाल नवीन अवसर लिमिटेड

गुजरात : आर्सेलरमित्तल निप्पॉन स्टील इंडिया

तेलंगणा : अपोलो मेडस्किल, दोन मंजूर आयटीआय क्लस्टर्स

(इंग्रजी बातमी वाचण्यासाठी येथे क्लिक करा.)