अमरावती : देशातील सर्वात श्रीमंत देवस्थान तिरुमला तिरुपती देवस्थानमने (टीटीडी) देवस्थानच्या परिसरात राजकीय आणि द्वेषपूर्ण भाषणांवर बंदी घातली आहे.

‘टीटीडी’ने याबाबत सोशल मीडियावर पोस्ट केली आहे. राजकारण्यांसह काही लोकांनी दर्शनानंतर मंदिर परिसराजवळ मीडियासमोर राजकीय किंवा प्रक्षोभक विधाने केली होती. त्यामुळे येथील आध्यात्मिक शांतता भंग पावली आहे. त्यामुळे मंदिराचे पावित्र्य आणि आध्यात्मिक शांततेचे रक्षण करण्यासाठी द्वेषपूर्ण भाषणांवर बंदी घालण्याचा निर्णय घेण्यात आला आहे.

सर्वांना या निर्णयाचा आदर करण्याचे आवाहन ‘टीटीडी’ने केले असून उल्लंघन करणाऱ्यांवर कायदेशीर कारवाई करण्याचा इशारा दिला. दरम्यान, हा नियम बऱ्याच काळांपासून लागू आहे. उल्लंघन करणाऱ्यांना शिक्षा झाल्याची अनेक उदाहरणे आहेत, असे आंध्र प्रदेशचे माजी मुख्य सचिव एल. व्ही. सुब्रमण्यम यांनी सांगितले.