नवी दिल्ली : केंद्रीय राखीव पोलीस दलाच्या 'कोब्रा' या विशेष जंगल युद्धातील कमांडो युनिटच्या पोलीस महानिरीक्षकपदी (आयजी) आयपीएस अधिकारी संजुक्ता पराशर यांची नियुक्ती करण्यात आली आहे. या विशेष कमांडो दलाचे नेतृत्व करणाऱ्या त्या पहिल्या महिला अधिकारी ठरल्या आहेत. संजुक्ता पराशर या २००६ च्या तुकडीतील आसाम-मेघालय कॅडरच्या आयपीएस अधिकारी आहेत. सीआरपीएफ मुख्यालयाने गेल्या आठवड्यात या संदर्भातील अधिकृत आदेश जारी केले आहेत. पराशर या १९९६ च्या तुकडीचे आयपीएस अधिकारी दानेश राणा यांच्याकडून कोब्रा दलाच्या आयजी पदाची सूत्रे स्वीकारतील.
एका वरिष्ठ अधिकाऱ्याने दिलेल्या माहितीनुसार, १० बटालियनचे संख्याबळ असलेल्या सीआरपीएफच्या कोब्रा दलाची धुरा एका महिला अधिकाऱ्याकडे सोपवण्याची ही पहिलीच वेळ आहे. संजुक्ता पराशर यांनी यापूर्वी राष्ट्रीय तपास संस्थेत सेवा बजावली असून, आपल्या मूळ आसाम कॅडरमध्येही विविध महत्त्वाच्या पदांवर काम केले आहे.
कोब्रा दलाची पार्श्वभूमी
देशातील विविध राज्यांमधील डाव्या विखारी विचारसरणीच्या हिंसेचा सामना करण्यासाठी आणि ईशान्येकडील राज्यांमधील बंडखोरी रोखण्यासाठी सीआरपीएफने २००८-०९ मध्ये 'कोब्रा' दलाची स्थापना केली होती.