नवी दिल्ली : भारतीय कम्युनिस्ट पक्षाचे (मार्क्सवादी) सरचिटणीस सीताराम येचुरी यांनी मंगळवारी अयोध्येतील राम मंदिराच्या २२ जानेवारीला होणाऱ्या अभिषेक सोहळ्याला उपस्थित राहण्याचे आमंत्रण नाकारले. असे करणारे ते एकमेव राजकीय पक्षाचे प्रमुख बनले आहेत.
अयोध्या राम मंदिर बांधकाम समितीचे अध्यक्ष नृपेंद्र मिश्रा आणि विश्व हिंदू परिषदेच्या नेत्याने मंगळवारी येचुरी यांची राजधानीतील सीपीआय (एम) मुख्यालयात निमंत्रण देण्यासाठी भेट घेतली. मात्र, येचुरी यांनी आमंत्रण नाकारले. सीपीआय (एम) ने आपल्या निवेदनात म्हटले आहे की, धर्मनिरपेक्षतेच्या तत्वाचे शासनाकडून उल्लंघन केले जात आहे. भारतीय कम्युनिस्ट पक्षाचे (सीपीआय) प्रमुख डी. राजा हेही निमंत्रण नाकारण्याची शक्यता आहे.
श्री रामजन्मभूमी तीर्थक्षेत्र ट्रस्टने २२ जानेवारीच्या कार्यक्रमासाठी माजी पंतप्रधान आणि प्रमुख राजकीय पक्षांच्या नेत्यांना आमंत्रित केले आहे. गेल्या आठवड्यात निमंत्रण मिळाल्यानंतर, काँग्रेसने पक्षाच्या वतीने प्रतिनिधी पाठवण्याचे संकेत दिले होते, तर इतर बहुतेक राजकीय पक्षांनीही त्यांच्या नेत्यांना आमंत्रित केले असल्यास ते समारंभास उपस्थित राहतील, असे सांगितले. कर्नाटकचे माजी मुख्यमंत्री एचडी कुमारस्वामी यांनी मंगळवारी सांगितले की, ते आपल्या कुटुंबासह प्राणप्रतिष्ठा किंवा अभिषेक समारंभाला उपस्थित राहणार आहेत. कुमारस्वामी यांनी नमूद केले की, राष्ट्रीय स्वयंसेवक संघाचे राम लाल आणि इतरांसह ट्रस्टच्या नेत्यांनी मंगळवारी त्यांची भेट घेतली. ट्रस्टने यापूर्वीच माजी पंतप्रधान एचडी देवेगौडा यांना आमंत्रित केले आहे.
काँग्रेसच्या भूमिकेकडे लक्ष
गेल्या आठवड्यात २२ जानेवारीच्या समारंभाला आपण उपस्थित राहणार का असे विचारले असता, समाजवादी पक्षाचे प्रमुख अखिलेश यादव म्हणाले की ट्रस्टने त्यांना आमंत्रित केले तर ते कार्यक्रमाला जातील. ट्रस्टने काँग्रेस नेतृत्वापैकी माजी पंतप्रधान मनमोहन सिंग, यूपीए अध्यक्षा सोनिया गांधी, काँग्रेस अध्यक्ष मल्लिकार्जुन खर्गे आणि पक्षाचे लोकसभा नेते अधीर चौधरी यांना आमंत्रित केले आहे. पक्षाने निमंत्रण स्वीकारले आहे.