सुरत : गुजरातमधील सुरत शहरातील खरवासा कॅनॉल रोडवरील एएनजी सोसायटीजवळ शनिवारी (दि. १४) कापडाच्या गोदामाला भीषण आग लागली. मोकळ्या भूखंडावर असलेल्या या गोदामात कापडाचा कचरा साठवण्यात आला होता. या आगीमुळे परिसरात घबराट पसरली. घटनेची माहिती मिळताच अग्निशमन दलाच्या गाड्या घटनास्थळी दाखल झाल्या. जवानांनी पाण्याचे फवारे मारून आगीवर मोठ्या प्रमाणात नियंत्रण मिळवले. मात्र, आग लागण्याचे नेमके कारण अद्याप स्पष्ट झालेले नाही.

कापडाच्या कचऱ्याच्या गोदामाला आग

'एएनआय'च्या वृत्तानुसार, सुरतमधील या गोदामात कापडाच्या चिंध्या साठवण्यात आल्या होत्या. सुमारे दोन बिघे म्हणजेच साधारण ३४,८४८ चौ. फूट क्षेत्रफळाच्या मोकळ्या भूखंडावर हे गोदाम होते. येथे कापडाचा कचरा नियमबाह्य पद्धतीने साठवण्यात आल्याची माहिती समोर आली आहे.

घटनेचा व्हिडीओ समोर

या घटनेचे व्हिडीओही समोर आले आहेत. त्यामध्ये अग्निशमन दलाचे जवान पाण्याचे फवारे मारून आग विझवताना दिसत आहेत. तसेच, गोदामातून निघणारे धुराचे काळे लोट परिसरात पसरल्याचेही व्हिडीओमध्ये पाहायला मिळत आहे. आगीची तीव्रता लक्षात घेता अग्निशमन दलाच्या आठ ते नऊ गाड्या घटनास्थळी दाखल झाल्या होत्या. जवानांनी केलेल्या प्रयत्नांनंतर आगीवर मोठ्या प्रमाणात नियंत्रण मिळवण्यात आले.

आगीचे कारण अद्याप अस्पष्ट

या आगीमुळे गोदामातील कापडाच्या चिंध्यांचे किती नुकसान झाले, याबाबत अद्याप माहिती समोर आलेली नाही. तसेच आग नेमकी कशामुळे लागली, याचाही तपास सुरू आहे. गोदामात कापडाचा कचरा नियमबाह्य पद्धतीने साठवण्यात आला होता का, याबाबतही अधिकृत माहिती मिळालेली नाही.

(संबधित इंग्रजी बातम्या वाचण्यासाठी येथे क्लिक करा.)