नवी दिल्ली : केंद्र सरकारने डिझेल आणि विमान इंधनाच्या (एटीएफ) निर्यातीवरील म्हणजेच 'विंडफॉल टॅक्स'मधील वाढ आता दुप्पट करण्यात आली आहे. डिझेलवरील कर प्रति लिटर आता ५५.५ रुपये, तर विमान इंधनावरील कर प्रति लिटर ४२ रुपये असेल. ही दरवाढ तत्काळ प्रभावाने लागू करण्यात आली असल्याची माहिती अर्थ मंत्रालयाने एका अधिसूचनेद्वारे दिली आहे.

२६ मार्च रोजी सरकारने डिझेलवर प्रति लिटर २१.५० रुपये आणि विमान इंधनावर २९.५ रुपये निर्यात शुल्क लागू केले होते. आशियातील युद्धामुळे निर्माण झालेल्या परिस्थितीत देशांतर्गत इंधनाची उपलब्धता वाढवण्यासाठी हे पाऊल उचलण्यात आले होते. जागतिक स्तरावर कच्च्या तेलाच्या किमती वाढल्याने निर्यातदारांनी त्याचा अवाजवी फायदा घेऊ नये, हादेखील यामागील उद्देश होता. पेट्रोलवरील निर्यात शुल्क मात्र अद्याप शून्य ठेवण्यात आले आहे.