मुंबई : गेल्या अनेक वर्षांपासून बहुप्रतीक्षित असलेल्या नवी मुंबई विमानतळ व मेट्रो-३ चे स्वप्न अखेर साकार होणार आहे. पंतप्रधान नरेंद्र मोदी यांच्या हस्ते बुधवारी दुपारी नवी मुंबई आंतरराष्ट्रीय विमानतळाच्या पहिल्या टप्प्याचे उद्घाटन करण्यात येणार आहे. तसेच मुंबई मेट्रो मार्ग-३ (आरे ते कुलाबा) अंतिम टप्प्याचे उद्घाटनही पंतप्रधानांच्या हस्ते केले जाणार आहे.
‘मुंबई वन’ या देशातील पहिल्या एकात्मिक कॉमन मोबिलिटी ॲपचे लोकार्पण त्याचबरोबर राज्यातील ४१९ आयटीआय आणि १४१ तांत्रिक संस्थांमध्ये २,५०६ बॅचेसच्या माध्यमातून नवीन अल्प मुदतीचे रोजगारक्षम अभ्यासक्रम या उपक्रमाची सुरुवात मोदींच्या हस्ते होणार आहे.
नवी मुंबई विमानतळाजवळील प्रांगणात होणाऱ्या या कार्यक्रमास नवनियुक्त राज्यपाल आचार्य देवव्रत, मुख्यमंत्री देवेंद्र फडणवीस, उपमुख्यमंत्री एकनाथ शिंदे, उपमुख्यमंत्री अजित पवार, केंद्रीय नागरी उड्डाण मंत्री किंजरापु राममोहन नायडू, केंद्रीय राज्यमंत्री मुरलीधर मोहोळ, विधानसभा अध्यक्ष ॲॅड. राहुल नार्वेकर, कौशल्य, रोजगार, उद्योजकता व नावीन्यता मंत्री मंगलप्रभात लोढा, लोकसभा सदस्य श्रीरंग बारणे यांच्यासह विविध लोकप्रतिनिधी आणि मान्यवर उपस्थित राहणार आहेत.
नवी मुंबई आंतरराष्ट्रीय विमानतळाच्या पहिल्या टप्प्यात १९ हजार ६४७ कोटींची गुंतवणूक करण्यात आली असून १,१६० हेक्टर क्षेत्रावर उभारलेल्या या विमानतळाची दरवर्षी २० दशलक्ष प्रवासी आणि ०.५ दशलक्ष टन मालवाहतूक करण्याची क्षमता आहे. अंतिम टप्प्यात हे विमानतळ ९० दशलक्ष प्रवासी आणि ३.२५ दशलक्ष टन मालवाहतूक क्षमतेचे जागतिक दर्जाचे केंद्र बनेल. दोन समांतर कोड-एफ रनवे, जलद बाहेर पडण्यासाठी टॅक्सीवे, अत्याधुनिक मालवाहतूक टर्मिनल, सौरऊर्जेवर आधारित ४७ मेगावॅटचा ऊर्जेचा पुरवठा आणि इलेक्ट्रिक बससेवा ही या विमानतळाची वैशिष्ट्ये आहेत. तसेच, हा देशातील पहिला वॉटर टॅक्सीने जोडलेला विमानतळ असणार आहे.
या विमानतळावरून डिसेंबर २०२५ मध्ये देशांतर्गत व आंतरराष्ट्रीय उड्डाणे सुरू होणार असून, नवी मुंबई आंतरराष्ट्रीय विमानतळ हे भारताच्या आधुनिक, हरित आणि जागतिक दर्जाच्या विमान वाहतूक पायाभूत सुविधेचे प्रतीक ठरणार आहे.
मुंबईतील वाहतुकीत क्रांती घडवणाऱ्या ३३.५ कि.मी. लांबीच्या पूर्ण भूमिगत मेट्रो लाईन-३ च्या अंतिम टप्प्याचे आचार्य अत्रे चौक-कफ परेड मार्गाचे उद्घाटनही मोदी यांच्या हस्ते यावेळी केले जाणार आहे. एकूण २७ स्थानके असलेली ही मार्गिका दररोज १३ लाख प्रवाशांना सेवा देईल. दर पाच मिनिटांनी धावणाऱ्या आठ डब्यांच्या गाड्या प्रति तास ७२,००० प्रवासी वाहून नेतील. सायन्स सेंटर ते कफ परेड असा १०.९९ किमीचा टप्पा १२,१९५ कोटी रुपये खर्चून बांधण्यात आला असून, हा मार्ग मंत्रालय, उच्च न्यायालय, आरबीआय, शेअर मार्केट, मरीन ड्राइव्हसारख्या आर्थिक व सांस्कृतिक ठिकाणांना जोडला जाणार आहे.
‘मुंबई वन’ एकच ॲप सर्व ठिकाणी
मुंबई महानगरातील प्रवाशांना अखंड आणि सुलभ प्रवास अनुभव देण्यासाठी पंतप्रधान नरेंद्र मोदी यांच्या हस्ते ‘मुंबई वन’ या भारतातील पहिल्या एकात्मिक कॉमन मोबिलिटी ॲपचे अनावरण होणार आहे. हे ॲप उपनगरीय रेल्वे, मेट्रो लाईन्स, मोनोरेल, बेस्ट, टीएमटी, एनएमएमटी, केडीएमटी, एमबीएमटी, नवी मुंबई मेट्रो इत्यादी ११ सार्वजनिक वाहतूक ऑपरेटरशी जोडले जाणार आहे.