नवी मुंबई : शहरातील वाढती गुन्हेगारी आटोक्यात आणण्यासाठी नवी मुंबई पोलीस दलाने तंत्रज्ञानाधिष्ठित पाऊल उचलत बेलापूर येथे अत्याधुनिक सीसीटीव्ही कमांड सेंटर उभारण्याचा निर्णय घेतला आहे. या केंद्रातून नवी मुंबई महापालिका, पनवेल, उरण, खारघर, तळोजा, कळंबोली, अटल सेतू तसेच नवी मुंबई आंतरराष्ट्रीय विमानतळ परिसरातील सीसीटीव्ही कॅमेऱ्यांवर थेट देखरेख ठेवली जाणार आहे. दरम्यान, मागील वर्षाच्या तुलनेत यंदा गुन्हे उकल दरात वाढ झाल्याने नवी मुंबई पोलिसांचा तपास अधिक वेगवान आणि परिणामकारक ठरत असल्याचे चित्र आहे.

या वेळी सहपोलीस आयुक्त संजय येनपुरे, अतिरिक्त पोलीस आयुक्त दीपक साकोरे, पोलीस उपायुक्त सचिन सूर्यवंशी, अमित काळे, अनिलकुमार पाटील, रश्मी नांदेडकर आदी अधिकारी उपस्थित होते. नवी मुंबईचे झपाट्याने वाढते नागरीकरण आणि नैना (NAINA) प्रकल्प क्षेत्राचा विस्तार लक्षात घेऊन बेलापूर येथे उभारण्यात येणाऱ्या कमांड सेंटरमध्ये हजारो कॅमेऱ्यांचे एकत्रित नियंत्रण केले जाणार आहे.

नवी मुंबई शहरात २०२४ मध्ये ७,७३९ गुन्हे नोंदवले गेले होते. त्यापैकी ७,८३५ गुन्ह्यांची उकल करण्यात पोलिसांना यश आले. २०२५ मध्ये गुन्ह्यांचा आकडा वाढला असला तरी एकूण ७,८३५ गुन्ह्यांपैकी ६,२७६ गुन्ह्यांची उकल करण्यात यश आले आहे. गुन्हे उकल दर २०२४ मधील ७७ टक्क्यांवरून २०२५ मध्ये ८० टक्क्यांपर्यंत वाढला आहे.

कॅमेऱ्यांचे मॉनिटरिंग

या केंद्रातून पुढील कॅमेऱ्यांचे मॉनिटरिंग होणार आहे. त्याप्रमाणे नवी मुंबई महापालिका क्षेत्रात १,२०० कॅमेरे, पनवेल महापालिका क्षेत्रात १,५०३ कॅमेरे, सिडको क्षेत्रात ५२१ कॅमेरे, अटल सेतूसाठी १९६ कॅमेरे, पोलीस वाहनांतील कॅमेरे २२० आणि वाहतूक शाखेच्या कर्मचाऱ्यांकडे असणाऱ्या बॉडी कॅमेऱ्यामध्ये १० चा समावेश असून हे सर्व कॅमेरे कमांड सेंटरशी जोडले जाणार असून एआय तंत्रज्ञानाच्या मदतीने संशयास्पद हालचालींचे विश्लेषण केले जाईल, असे आयुक्तांनी स्पष्ट केले. वाहतूक शाखेतील पोलिसांना आतापर्यंत १० बॉडी वॉर्न कॅमेरे देण्यात आले असून ही संख्या वाढवली जाणार आहे. यामुळे कारवाई अधिक पारदर्शक आणि नोंदीसह होणार आहेत. शहरातील विविध भागांत बीट मार्शलद्वारे सुरू असलेले पेट्रोलिंग आता डिजिटल पद्धतीने मॉनिटर केले जाणार आहे. संबंधित अधिकारी किती वेळा व किती वेळ ठराविक ठिकाणी गेले, याची नोंद प्रणालीत उपलब्ध राहणार आहे.

वाहतूक कारवाईत वाढ

वाहतुकीचे नियम मोडणाऱ्यांविरोधातील कारवाईतही वाढ झाली आहे. यामध्ये २०२४ साली ८,८७,७७० प्रकरणे नोंदविण्यात आली होती, तर २०२५ मध्ये ९,८०,८०६ प्रकरणे नोंदवली गेली आहे. यावर्षी २,०३,४३७ हेल्मेट न घालणाऱ्या दुचाकीस्वारांवर कारवाई करण्यात आली आहे.

पोलीस आयुक्तालयासाठी नवीन भव्य इमारत

नवी मुंबईतील वाढते नागरीकरण आणि वाढती पोलीस ठाण्यांची संख्या लक्षात घेता सध्याची आयुक्तालयाची इमारत अपुरी पडत आहे. त्यामुळे नवीन भव्य पोलीस आयुक्तालय इमारतीचे नियोजन सुरू असल्याची माहितीही आयुक्त मिलिंद भारंबे यांनी दिली.