अबूधाबी : अझमतुल्ला ओमरझाई (२१ चेंडूंत ५३ धावा) आणि सेदिउल्ला अटल (५२ चेंडूंत नाबाद ७३ धावा) यांनी मंगळवारी तुफानी फटकेबाजी केली. त्यामुळे अफगाणिस्तानने आशिया चषक टी-२० क्रिकेट स्पर्धेत विजयी सलामी नोंदवताना हाँगकाँगचा ९४ धावांनी धुव्वा उडवला.
अबूधाबी येथील झैद स्टेडियमवर झालेल्या या सामन्यात अफगाणिस्तानने २० षटकांत ६ बाद १८८ धावांपर्यंत मजल मारली. प्रत्युत्तरात हाँगकाँगचा दुबळा संघ २० षटकांत ९ बाद ९४ धावांपर्यंतच पोहचू शकला. गुलबदीन नैब व फझलहक फारुकी यांनी प्रत्येकी २ बळी मिळवले.
आशिया चषकातील आजवरचे वेगवान अर्धशतक झळकावण्यासह (२० चेंडूंत) गोलंदाजीत १ बळी मिळवणाऱ्या ओमरझाईला सामनावीर पुरस्काराने गौरवण्यात आले. त्याने ५ षटकार व २ चौकार लगावले. तर अटलने ६ चौकार व ३ षटकारांसह अर्धशतकी खेळी साकारली. या विजयासह अफगाणिस्तानने ब-गटात २ गुणांसह अग्रस्थान मिळवले. त्यांची आता १६ तारखेला बांगलादेशशी गाठ पडेल, हाँगकाँगचा संघ गुरुवारी बांगलादेशशी खेळेल.
दरम्यान, आशिया चषकाच्या १७व्या पर्वाला मंगळवारपासून प्रारंभ झाला. पुढील वर्षी भारतात होणाऱ्या टी-२० विश्वचषकाच्या निमित्ताने आशियाई खंडातील देशांना सराव मिळावा, म्हणून यंदाचा आशिया चषक टी-२० प्रकारात खेळवण्यात येईल. या स्पर्धेत ८ संघ सहभागी झाले असून त्यांची दोन गटांत विभागणी करण्यात आली आहे. भारतीय संघासह पाकिस्तान, यूएई व ओमान अ-गटात आहेत. तर ब-गटात बांगलादेश, श्रीलंका, अफगाणिस्तान व हाँगकाँग हे संघ आहेत. प्रत्येक गटातील आघाडीचे दोन संघ सुपर-फोर फेरी गाठतील. मग सुपर-फोर फेरीत प्रत्येकी तीन सामने खेळल्यानंतर आघाडीचे दोन संघ अंतिम फेरीत खेळतील.