नागोया : भारताच्या सुरूची सिंह आणि कमलजित यांनी शानदार कामगिरी करत शुक्रवारी आशियाई क्रीडा स्पर्धेतील १० मीटर एअर पिस्तूल मिश्र सांघिक प्रकारात सुवर्णपदक पटकावले. वैयक्तिक प्रकारातील निराशाजनक कामगिरीनंतर दोघांनीही दमदार पुनरागमन करत भारताला सुवर्णपदक मिळवून दिले.
यानंतर ऐश्वर्य प्रतापसिंह तोमर, रुद्रांक्ष पाटील आणि नीरज कुमार यांच्या भारतीय संघाने पुरुषांच्या ५० मीटर रायफल थ्री पोझिशन्स सांघिक प्रकारात रौप्यपदक मिळवले. भारताने १७६२ गुणांची नोंद केली. चीनने १७६६ गुणांसह सुवर्णपदक, तर दक्षिण कोरियाने १७५१ गुणांसह कांस्यपदक पटकावले.
ऐश्वर्य प्रतापसिंह तोमरने ५८९, तर नीरज कुमारने ५८८ गुण मिळवत थ्री पोझिशन्सच्या वैयक्तिक अंतिम फेरीतही स्थान मिळवले. मात्र, एका देशातील केवळ दोन नेमबाजांना वैयक्तिक अंतिम फेरीत प्रवेश मिळत असल्याने रुद्रांक्षला अंतिम फेरीत स्थान मिळू शकले नाही.
अंतिम फेरीत मात्र भारतीय नेमबाजांना अपेक्षित कामगिरी करता आली नाही. ऐश्वर्य ३२७.६ गुणांसह पाचव्या, तर नीरज आठव्या स्थानावर राहिला. चीनच्या पॅरिस ऑलिम्पिक विजेत्या युकुन लिऊने ३६०.५ गुणांसह आशियाई क्रीडा स्पर्धेचा विक्रम नोंदवत सुवर्णपदक पटकावले. त्याचा सहकारी आणि टोकियो ऑलिम्पिक सुवर्णपदक विजेता चांगहोंग झांगने ३६०.२ गुणांसह रौप्य, तर कझाकस्तानच्या इस्लाम सतपायेवने कांस्यपदक जिंकले.
दरम्यान, कमलजित आणि सुरूची यांनी अंतिम फेरीत एकूण ४८४.६ गुणांची नोंद केली. अंतिम फेरीतील पदकाच्या लढतीसाठी अव्वल चार जोड्या पात्र ठरल्या. दक्षिण कोरियाच्या सुह्योन हाँग आणि गॅउन चू यांनी ४७८ गुणांसह दुसरे स्थान मिळवले. भारतीय जोडीपेक्षा त्या ६.६ गुणांनी मागे राहिल्या. इराणने ४१५.८ गुणांसह कांस्यपदक पटकावले.
५० मीटर रायफल थ्री पोझिशन्सच्या अंतिम फेरीत ऐश्वर्यने गुडघ्यावरून नेम साधण्याच्या प्रकारानंतर १०२.९ गुणांसह तिसरे स्थान मिळवले. नीरज ९७.१ गुणांसह आठव्या स्थानावर होता. प्रोन पोझिशनमध्ये ऐश्वर्यने १०२.४ गुणांची भर घालत एकूण २०५.३ गुण केले आणि तो सहाव्या स्थानावर पोहोचला. नीरजने १०३.८ गुण मिळवत एकूण २००.९ गुण केले, मात्र तो शेवटच्या स्थानावरच राहिला.
२५ शॉट्सनंतर ऐश्वर्यने २५६.५ गुणांसह पाचव्या स्थानावर झेप घेतली. त्यानंतर त्याने १०.७ गुणांचा अचूक शॉट मारत पदकाच्या शर्यतीत स्वतःला कायम ठेवले. मात्र, जपानचा नाओया ओकादा ३१३.८ गुणांसह सहाव्या स्थानावर बाद झाला.