हरारे: मॅट रेनशॉचे (९४ चेंडूंत १०९ धावा) पहिले एकदिवसीय शतक आणि जलदगती गोलंदाज नॅथन एलिसचे ५ बळी यांच्या जोरावर ऑस्ट्रेलियाने पहिल्या एकदिवसीय सामन्यात झिम्बाब्वेचा ५९ धावांनी पराभव केला. या विजयासह ऑस्ट्रेलियाने तीन सामन्यांच्या मालिकेत १-० अशी आघाडी घेतली आहे.
प्रथम फलंदाजी करताना ऑस्ट्रेलियाने ५० षटकांत ८ बाद २९४ धावांचा डोंगर उभारला. रेनशॉने ९४ चेंडूंत ७ चौकार आणि ३ षटकारांच्या मदतीने १०९ धावांची खेळी केली, तर कुपर कॉनोलीने ५१ धावांचे योगदान दिले. १२ वर्षांनंतर झिम्बाब्वेच्या भूमीत पहिला एकदिवसीय सामना खेळणाऱ्या ऑस्ट्रेलियन संघाची सुरवात खराब झाली होती.
१०७धावांवर ४ गडी गमावल्यानंतर रेनशॉने कॅरीसोबत ७२ धावांची आणि ऑलिव्हर पीकसोबत (३० धावा) ७४ धावांची भागीदारी करत संघाचा डाव सावरला. आव्हानाचा पाठलाग करताना झिम्बाब्वेचा संघ २३५ धावांवर आटोपला. एलिसने पहिल्याच षटकात दोन फलंदाजांना बाद केले होते.