फॉक्सबोरो (एपी) : अर्जेंटिनाचा लिओनेल मेस्सी आणि फ्रान्सच्या किलियन एम्बाप्पे यांच्यासह आता ओस्माने डेम्बेले यानेही 'गोल्डन बूट'च्या शर्यतीत आपले नाणे खणखणीत असल्याचे दाखवून दिले. डेम्बेले याने हॅटट्रिक साजरी करत फ्रान्सला नॉर्वेवर ४-१ असा विजय मिळवून देत आपल्या संघाला बाद फेरीत सहजपणे प्रवेश मिळवून दिला.
'आय' गटात फ्रान्सने सलग तिसरा विजय मिळवत आपली घोडदौड कायम राखली आहे. नॉर्वेला पराभूत व्हावे लागले तरीही त्यांनी ६ गुणांसह बाद फेरीतील आपले स्थान निश्चित केले आहे. या सामन्यात डेम्बेलेने पहिल्या सत्रात म्हणजे सातव्या, २०व्या आणि ३२व्या मिनिटाला गोल केले. १९९४ च्या विश्वचषकात रशियाच्या ओलेग सालेन्कोने कॅमेरूनविरुद्ध पहिल्या ४५ मिनिटांत तीन गोल केले होते, त्यानंतरची ही पहिलीच घटना आहे.
फ्रान्सचे प्रशिक्षक दिदिएर देसचॅम्प या सामन्याला उपस्थित राहू शकले नाहीत. त्यांची आई जिनेट देशाँ यांचे निधन झाल्यामुळे ते आपल्या कुटुंबासोबत फ्रान्समध्ये होते. चाहत्यांनी स्टेडियममध्ये 'अवेक तोई दिदिए' असा फलक लावून त्यांना पाठिंबा दिला. सहाय्यक प्रशिक्षक गाय स्टेफान यांनी संघाची धुरा सांभाळली. डेम्बेलेने या सामन्यात एकूण तीन गोल केले, तर डिझायर ड्युएने दुखापत वेळेत शेवटचा गोल केला. नॉर्वेचा एकमेव गोल थेलो आसगार्डने केला.
डेम्बेलेने पहिल्या सत्रात हॅटट्रिक साजरी केल्यानंतर ६५व्या मिनिटाला ते पॅव्हेलियनमध्ये परतला. त्याच्या जागी ब्रँडली बार्कोला याला संधी देण्यात आली. एम्बाप्पेने सामन्याच्या सुरुवातीलाच गोल करण्याचा प्रयत्न केला, परंतु त्याचा फटका क्रॉसबारला लागला. नॉर्वेच्या जर्गन स्ट्रेंड लार्सनला पेनल्टीची संधी मिळाली, परंतु फ्रान्सचा गोलकीपर माईक मेगनने ती फेटाळून लावली.
या विजयासह फ्रान्सने आपले स्थान अधिक मजबूत केले आहे. विश्वचषकात आतापर्यंत फ्रान्सने तीन सामन्यांत १० गोल केले आहेत. नॉर्वेचे प्रशिक्षक स्टॅले सोल्बाकेन यांनी अर्लिंग हालंडसह दहा नियमित खेळाडूंना विश्रांती दिली होती. २०२५ सालचा 'बलॉन डीऑर' पुरस्कार जिंकणाऱ्या डेम्बेले याने यंदाच्या विश्वचषक स्पर्धेत आतापर्यंत चार गोल केले असून त्याचा सहकारी एम्बाप्पे याच्याही नावावर चार गोल जमा आहेत. एम्बाप्पेने सेनेगल आणि इराकविरुद्धच्या सामन्यात प्रत्येकी दोन गोल केले आहेत.
नॉर्वेचा पुढील सामना मंगळवारी आयव्हरी कोस्टविरुद्ध तर फ्रान्सचा सामना न्यू जर्सी येथे होणार आहे. "आमच्यासाठी हा अविश्वसनीय असा क्षण आहे. गटात पहिल्या क्रमांकावर पोहोचणे हे आमच्यासाठी सर्वात महत्त्वाचे आहे. आता आम्ही बाद फेरीवर लक्ष केंद्रित केले आहे," असे डेम्बेलेने सामन्यानंतर सांगितले. फ्रान्सने २०१८मध्ये विश्वचषकाला गवसणी घातली असून गेल्या वेळी त्यांना अंतिम फेरीत पराभवाचा सामना करावा लागला आहे.