चार प्रतिष्ठित ग्रँडस्लॅम स्पर्धांपैकी एक असलेल्या विम्बल्डन टेनिस स्पर्धेत भारताची तारांकित खेळाडू सानिया मिर्झाने तिचा क्रोएशियन साथीदार मेट पेव्हिक याच्यासह मिश्र दुहेरीच्या उपांत्य फेरीत धडक मारली. मिश्र दुहेरीच्या उपांत्यपूर्व फेरीच्या सामन्यात या जोडीने गॅब्रिएला डुब्रोव्स्की आणि जॉन पीअर्स या जोडीचा ६-४, ३-६, ७-५ असा पराभव केला.
सानिया आणि पेव्हिक या सहाव्या मानांकित जोडीने चौथ्या मानांकित गॅब्रिएला डुब्रोव्स्की-जॉन पियर्स यांचा एक तास ४१ मिनिटांच्या लढतीत शानदार विजय मिळविला. सानियाची ही शेवटची विम्बल्डन स्पर्धा असणार आहे. या मोसमानंतर टेनिसमधून निवृत्ती घेणार असल्याचे तिने आधीच जाहीर केले आहे. आता उर्वरित दोन सामने जिंकून सानियाला तिचे शेवटचे विम्बल्डन संस्मरणीय करण्याची नामी संधी उपलब्ध झाली आहे. तिने प्रथमच विम्बल्डन ओपनच्या मिश्र दुहेरी प्रकारात उपांत्य फेरी गाठली.
उपांत्य फेरीत सानिया आणि पेव्हिकची जोडीचा सामना दुसऱ्या उपांत्यपूर्व फेरीतील विजेत्याशी होईल. उपांत्यपूर्व फेरीतील दुसरा सामना डेजारे-नील स्कुप्स्की या द्वितीय मानांकित जोडी आणि सातव्या मानांकित जेलेना ओस्टापेन्को-रॉबर्ट फराह यांच्यात आहे.
सानियाने महिला दुहेरी गटातही भाग घेतला होता. परंतु ती आणि तिची चेक जोडीदार लुसी पहिल्याच सामन्यात बाहेर गेल्या होत्या.