पॅरिस : बॅडमिंटनमध्ये भारताची पदक लयलूट कायम असून यामध्ये सुहास यथिराज आणि निथ्या सिवन यांच्या अनुक्रमे रौप्य व कांस्यकमाईची भर पडली आहे.

पुरुष एकेरीतील एसएल ४ प्रकारात सुहासला फ्रान्सच्या लुकास माझूरकडून ९-२१, १३-२१ असा पराभव पत्करावा लागला. मात्र सलग दोन पॅरालिम्पिक स्पर्धेत पदक जिंकणारा तो भारताचा पहिला बॅडमिंटनपटू ठरला. ४१ वर्षीय सुहासने २०२०च्या टोकियो पॅरालिम्पिकमध्येही रौप्यपदकच जिंकले होते.

महिला एकेरीतील एसएच ६ प्रकारात निथ्याने पहिल्याच पॅरालिम्पिकमध्ये कांस्यपदक जिंकले. १९ वर्षीय निथ्याने इंडोनेशियाच्या रिना मार्टिनाला २१-१४, २१-६ असे पराभूत केले. एसएच ६ प्रकारात उंचीने कमी असलेले बॅडमिंटनपटू खेळतात.

यंदाच्या पॅरालिम्पिकमध्ये भारताने बॅडमिंटनमध्ये आतापर्यंत ५ पदके कमावली आहेत. यामध्ये नितेश कुमार (सुवर्ण), सुहास यथिराज, तुलसिमती मुरुगेसन (रौप्य), मनीषा रामदास, निथ्या सिवन (कांस्य) यांचा समावेश आहे.