स्काउट हॉल शिवाजी पार्क येथे सुरू असलेल्या इंडियन ऑइल व भारतीय आयुर्विमा महामंडळ पुरस्कृत ३०व्या वरिष्ठ मुंबई जिल्हा अजिंक्यपद कॅरम स्पर्धेच्या आंतर क्लब सांघिक गटात महाराष्ट्र कामगार कल्याण मंडळ, ना. म. जोशी मार्ग संघाने शिवतारा संघाचा २-१ पराभव करून विजयाला गवसणी घातली.
अमोल सावर्डेकरने मनोज कांबळेवर २१-६, २२-११ अशी सहज मात केली. तर ओंकार नेटकेने राहुल सोळंकीला २१-६, ०-२५, १५-१० असे हरविले. दुहेरीच्या सामन्यात शिवताराने एकमेव विजय मिळविला. त्यांच्या विवेक भारती व अतुल पेटकर जोडीने सुपेश कामतेकर व सम्राट मोहिते जोडीवर १४-१७, २५-०, २५-१७ असा अटीतटीच्या लढतीत विजय मिळविला.
तिसऱ्या क्रमांकासाठी झालेल्या लढतीत वरळी स्पोर्ट्स क्लबने एस. एस. ग्रुपवर २-१ असा निसटता विजय मिळविला. त्यांच्या सलमान खानने सुरज कुंभारला ६-२५, २५-१७, २५-१६ असे पराभूत केले. तर एस एस ग्रुपच्या कुणाल राऊतने नितीन परमारवर १४-१३, २२-५ अशी मात करत सामना बरोबरीत आणला होता.
परंतु दुहेरीच्या सामन्यात फ्रान्सिस फर्नांडिस आणि प्रकाश सोळंकी जोडीने हरेश्वर बेतवंशी व सिद्धांत वाडवलकर जोडीवर १७-१३, २०-२ मात करत वरळी स्पोर्ट्स क्लबच्या विजयावर शिक्कामोर्तब केले.