गेल्या वर्षी अखेरीस भारतीय संघाचा विकेटकीपर फलंदाज ऋषभ पंतच्या कारला भीषण अपघात झाला. तो दिल्लीहून देहराडूनला आपल्या राहत्या घरी आईला भेटालया चालला होता. यावेळी ही दुर्घटना घडली होती. या अपघातामुळे ऋषभ पंत काही महिन्यांपासून क्रिकेटपासून लांब आहे. तो मैदानावर कधी उतरणार याबाबत अजून कुठलीही स्पष्टता नाही. आता भारतीय संघाकडून खेळलेल्या आणखी एका क्रिकेटपटूच्या कारला भीषण अपघात झाला आहे. मंगळावीर हा अपघात घडल्याची माहिती समोर आली आहे.
या क्रिकेटपटूच्या कारला अपघात झाला त्यावेळी त्याला मुलगा देखील कारमध्ये असल्याचं सांगितलं जात आहे. भारतीय संघातील वेगवान गोलंदाज राहिलेला प्रवीण कुमराच्या कारला मंगळवारी अपघात झाला आहे. प्रवीण कुमार हा पांडव नगरहून परत येत होता. त्यावेळी हा अपघात झाला. एक टँकर प्रवीण कुमारच्या गाडीला धडकल्याने हा अपघात घडला. यावेळी प्रवीण कुमारच्या कारच खुप नुकसान झालं आहे. सुदैवाने यात प्रवीण कुमार तसंच त्याच्या मुलाचा जीव वाचला आहे. यात ते किरकोळ जखमी झाले आहेत.
प्रवीण कुमारच्या कारला धडकलेल्या टँकरला पोलिसांनी घटनास्थळावरुन ताब्यात घेतलं आहे. प्रवीण कुमार हा मेरठच्या मुलतानमध्ये राहतो. त्याची कार रात्री पांडवनगरमधून जात असताना लँड रोव्हर कार टँकरला धडकली. सिव्हिल लाईन कमिश्नरी चौकात हा अपघात झाला. घटनेची माहिती मिळताच पोलीस घटनास्थळी पोहचले. यावेळी पोलिसांनी टँकरच्या ड्रायव्हरला अटक केली आहे. प्रवीण कुमारच्या ज्या कारचा अपघात झाला त्या कारची किंमत २.५० कोटी रुपये आहे.