मुंबई : भारतीय संघाच्या प्रशिक्षकपदाची जबाबदारी हा एक काटेरी मुकुट असतो. त्यामुळे कुणीही प्रशिक्षकपद स्वीकारले तरी चालेल. मात्र भारतीय संघासाठी काम चांगले करावे, असे मत माजी क्रिकेटपटू हरभजन सिंगने नोंदवले.

“गौतम गंभीर भारतीय संघाचा प्रशिक्षक होणार ही सध्या फक्त चर्चा आहे. खेळाडूंना एकत्र ठेवणे हे प्रशिक्षकाचे मोठे काम असते. त्यामुळे संघाची एकत्रित कामगिरी चांगली होत असते. गौतम काय किंवा आशीष नेहरा कुणालाही प्रशिक्षक बनण्याची संधी मिळो, त्यांनी पूर्वीच्या प्रशिक्षकाने केलेल्या कामापेक्षा अधिक चांगले काम करून दाखवावे इतकीच अपेक्षा आहे,” असे हरभजन म्हणाला.

“भारतीय संघाचे प्राशिक्षकपद ही पूर्णवेळ जबाबदारी आहे आणि तेवढा वेळ मी देऊ शकणार नाही. आयुष्याच्या अशा टप्प्यावर आहे की माझ्यावर कुटुंबाची जबाबदारी आहे आणि त्यांची काळजी घेणे याला माझे प्राधान्य राहील. जेव्हा योग्य वेळ येईल तेव्हा स्वत:हून मी प्रशिक्षकपदासाठी तयार असल्याचे सांगेन,” असे हरभजनने सांगितले.

दरम्यान, भारतीय संघ टी-२० विश्वचषकासाठी अमेरिकेत दाखल झाला आहे. विराट कोहली कागदपत्रांशी निगडीत कामामुळे ३१ तारखेपर्यंत तेथे पोहचेल. भारतीय संघाने सरावाला प्रारंभ केला असून १ तारखेला ते बांगलादेशविरुद्ध सराव सामना खेळणार आहेत. भारताकडून यंदा सर्वांना जेतेपदाची आशा असून त्यांच्या कामगिरीकडे लक्ष लागून आहे.