ठाणे : घोडबंदर रोडवरील पातलीपाडा उड्डाणपुलावर मंगळवारी मध्यरात्री साडेबाराच्या सुमारास भीषण अपघात घडला. नवी मुंबईहून सुमारे ८ टन लोखंडी पाइप व रॉड घेऊन गुजरातकडे निघालेल्या ट्रकने दुभाजकावरील विद्युत खांबाला जोरदार धडक दिली. या दुर्घटनेत ट्रकचालक विनोद (४२) आणि हेल्पर रहीम पठण (२५) या दोघांचा मृत्यू झाला. दोघेही उत्तर प्रदेशातील रहिवासी होते.

अपघात इतका भीषण होता की, ट्रकच्या केबिनमध्ये दोघेही अडकले. घटनेची माहिती मिळताच वाहतूक पोलीस, ठामपा आपत्ती व्यवस्थापन कक्ष आणि अग्निशमन दल घटनास्थळी दाखल झाले. अडकलेल्या चालक व हेल्परला बाहेर काढून तातडीने ठाणे जिल्हा शासकीय रुग्णालयात नेण्यात आले, मात्र तेथे डॉक्टरांनी त्यांना मृत घोषित केले.

धडकेमुळे ट्रकमधील लोखंडी पाइप आणि रॉड रस्त्यावर विखुरले गेले होते. हे साहित्य हायड्रा मशीनच्या सहाय्याने बाजूला करण्यात आले. अपघातानंतर उड्डाणपुलाच्या दोन्ही बाजूची वाहतूक सुमारे तीन तास ठप्प झाली होती. दरम्यान, वाहतूक सेवा पर्यायी मार्गांवरून अत्यंत धीम्या गतीने सुरू ठेवण्यात आली होती.