ठाणे: गणेश विसर्जन मिरवणुकांमध्ये यंदा डीजे आणि डॉल्बीच्या वापरात सुमारे २० टक्के घट झाल्याचे निरीक्षण नोंदविण्यात आले असले, तरी ढोल-ताशा, बँजो आणि ध्वनिवर्धकांच्या दणदणाटामुळे ठाणे शहरातील ध्वनी प्रदूषणाची समस्या कायम असल्याचे समोर आले आहे. १५ सप्टेंबर रोजी रात्री ८.३० ते ११ वाजेदरम्यान शहरातील विविध ठिकाणी करण्यात आलेल्या ध्वनीमापनात आवाजाची पातळी ९५ ते १०० डेसिबलपर्यंत पोहोचल्याची नोंद झाली.
गणेश विसर्जनाच्या पार्श्वभूमीवर शहरातील विविध मिरवणूक मार्गांवर ध्वनीपातळीची पाहणी करण्यात आली. रात्री ८.४५ वाजता आर.एम. रोड येथे ९० डेसिबल, तर ८.५३ वाजता एम.जी. रोड, नऊपाडा पोलीस ठाण्याजवळ तब्बल ९५ डेसिबल ध्वनीची नोंद झाली. या ठिकाणी ढोल आणि बँजोचा वापर सुरू असल्याचे निरीक्षणात आढळले.
अराधना टॉकीज परिसरात ८० ते ८५ डेसिबल, राम मारुती रोडवरील आयसीआयसीआय बँकेजवळ ९० ते ९५ डेसिबल, तर ठाणे महापालिका परिसरात तुलनेने कमी म्हणजे ७० ते ७५ डेसिबल ध्वनी नोंदविण्यात आला. वर्तकनगर पोलीस ठाणे परिसरात ८० ते ८५, एमआरआर हॉस्पिटलजवळ ८५ ते ९० आणि शिवाईनगर येथे ९० ते ९५ डेसिबल ध्वनीपातळीची नोंद झाली.
रात्री १०.१० वाजता पाचपाखाडी येथे ९० ते ९५ डेसिबल, तर रात्री १०.३० वाजता कोपरीतील १२ बंगले परिसरात ७५ ते ८० डेसिबल ध्वनीची नोंद झाली. रात्री ११ वाजता राम मारुती रोड परिसरात ९० ते ९५ डेसिबल ध्वनीपातळी नोंदविण्यात आली. त्यानंतर पी.एन. गाडगीळ शोरूम परिसरात ९५ ते १०० डेसिबल इतकी सर्वाधिक ध्वनीपातळी नोंदविण्यात आली. या ठिकाणी डीजे आणि अनेक ढोल एकाच वेळी सुरू असल्याचे निरीक्षणात नमूद करण्यात आले आहे. रात्री ११.०७ वाजता तलावपाळी येथेही ९० ते ९५ डेसिबल ध्वनीची नोंद झाली.
फिल्मी गाण्यांचा आवाज कमी
निरीक्षणानुसार, मागील वर्षांच्या तुलनेत बॉलीवूड किंवा फिल्मी गाणी मोठ्या आवाजात वाजविण्याचे प्रमाण लक्षणीयरीत्या कमी झाले आहे. डीजे आणि डॉल्बीच्या वापरातही सुमारे २० टक्के घट झाल्याचे नमूद करण्यात आले आहे. मात्र, बँजो, ढोल-ताशा, अनेक ढोल आणि ध्वनिवर्धक हे ध्वनी प्रदूषणाचे प्रमुख स्रोत ठरले.
रात्री ११ वाजता ध्वनीपातळीचा उच्चांक
रात्री ८.३० ते ११ या कालावधीत घेण्यात आलेल्या नोंदींमध्ये सरासरी ध्वनीपातळी ८० ते ८५ डेसिबलच्या आसपास राहिली. मात्र, विसर्जन मिरवणुका पुढे सरकत असताना विविध वाद्ये आणि ध्वनिवर्धक एकाच वेळी सुरू झाल्याने रात्री ११ वाजण्याच्या सुमारास ध्वनीपातळीने उच्चांक गाठल्याचे दिसून आले.