ठाणे : उपमुख्यमंत्री एकनाथ शिंदे यांच्या ताफ्यात अंगरक्षक म्हणून कार्यरत असलेले पोलीस उपनिरीक्षक विजय शंकर सांगडे (५७) यांचे हृदयविकाराच्या झटक्याने निधन झाले. ते कल्याण नियंत्रण कक्षात पोलीस उपनिरीक्षक म्हणून कार्यरत होते. गेल्या तीन वर्षांपासून ते उपमुख्यमंत्री शिंदे यांच्या एस्कॉर्ट पथकात जबाबदारी पार पाडत होते.
मिळालेल्या माहितीनुसार, सांगडे हे ठाण्यातील कोर्ट नाका येथील शासकीय विश्रामगृहात ड्युटीवर असताना अचानक त्यांच्या छातीत तीव्र कळ आली आणि त्यांना चक्कर आली. त्यांना तातडीने रुग्णालयात दाखल करण्यात आले; मात्र उपचारादरम्यान डॉक्टरांनी त्यांना मृत घोषित केले. त्यांचा मृतदेह ठाणे जिल्हा शासकीय रुग्णालयात नेण्यात आला.
घटनेची माहिती मिळताच नौपाडा पोलिसांचे पथक घटनास्थळी दाखल झाले. सांगडे हे मूळचे जुन्नरचे रहिवासी होते. ठाणे सिव्हिल रुग्णालय परिसरात शोकाकुल वातावरणात त्यांना शासकीय इतमामात अखेरचा निरोप देण्यात आला. ठाणे पोलिसांच्या तुकडीने बंदुकीच्या फैरी झाडून त्यांना मानवंदना दिली. त्यांच्या निधनाने पोलीस दलात हळहळ व्यक्त होत आहे.