ठाणे : ठाणे रेल्वे स्थानकाजवळील सॅटिस पुलाच्या छतावर ३० वर्षीय तरुण अडकल्याची घटना बुधवारी सकाळी उघडकीस आली. या घटनेची माहिती मिळताच पोलिस, अग्निशमन दल आणि आपत्ती व्यवस्थापन कक्षाच्या पथकांनी तातडीने घटनास्थळी धाव घेत बचावकार्य सुरू केले. संयुक्त प्रयत्नांतून तरुणाला सुखरूप खाली उतरविण्यात यश आले.
राम इंगोळे असे या तरुणाचे नाव आहे. बुधवारी सकाळी ८.५८ वाजण्याच्या सुमारास सॅटिस पुलाच्या छतावर एक व्यक्ती अडकल्याची माहिती ठाणे महापालिकेच्या आपत्ती व्यवस्थापन कक्षाला मिळाली. त्यानंतर ठाणे नगर पोलीस, अग्निशमन दलाचे जवान आणि आपत्ती व्यवस्थापन पथक घटनास्थळी दाखल झाले.
पथकांनी आवश्यक खबरदारी घेत बचावकार्य सुरू केले. काही वेळाच्या प्रयत्नांनंतर राम इंगोळे यांना सुरक्षितपणे छतावरून खाली उतरवण्यात आले. त्यानंतर पुढील कार्यवाहीसाठी त्यांना ठाणे नगर पोलिसांच्या ताब्यात देण्यात आले. दरम्यान, संबंधित तरुणाच्या डोक्यावर परिणाम झाल्याची माहिती सूत्रांनी दिली. त्यामुळे तो पुलाच्या छतावर कसा आणि कोणत्या कारणाने गेला, हे अद्याप स्पष्ट झालेले नाही. या घटनेमुळे काही काळ परिसरात नागरिकांची गर्दी झाली होती.