मुंबई : बदलापूर येथील शाळेत दोन चिमुरड्यांवर झालेल्या लैंगिक अत्याचाराच्या घटनेने अवघ्या महाराष्ट्रात संतापाची लाट उसळली असताना भाजप आमदार किसन कथोरे यांनी या प्रकरणी होणारे आंदोलन राजकीय स्टंटबाजी असल्याचा दावा केला आहे. लैंगिक अत्याचारप्रकरणी करण्यात येणारे आंदोलन राजकीय स्टंटबाजी आहे. हे आंदोलन करणारे आंदोलक बदलापूरचे नाहीत, असे त्यांनी म्हटले आहे.
किसन कथोरे म्हणाले की, “बदलापूरमधील आंदोलन आता भरटकले आहे. शाळा राहिली बाजूला आणि आंदोलक रेल्वेस्थानकात घुसले. रेल्वेत शिरलेले आरोपी बदलापूरचे नाहीत. सर्वजण बाहेरून आलेत. शाळेतील वातावरण आता शांत झाले आहे. शाळेच्या मुख्याध्यापिकेवर कारवाई झाली. कर्मचाऱ्यांवरही कारवाई झाली. संस्थाचालकाचीही चौकशी सुरू झाली आहे. या प्रकरणी शिक्षणाधिकाऱ्यांनी तातडीने चौकशीस सुरुवात केली. त्यानंतरही आंदोलन केले जात असल्याने ही राजकीय स्टंटबाजी असल्याचा वास येत आहे.”